【仙妮】剛出世的丘BB患了肺炎

經過超過一日嘅陣痛之後終於生咗丘BB，身體真係超級虛脫，以為生完之後可以好好休息一下，但事情並非咁順利……

喺丘BB出世第一日，過咗探病時間之後，我就開始試吓埋身餵，就算係未上奶都畀佢啜吓！初次都幾順利，但到咗夜晚十二㸃幾，姑娘叫我再餵時，我發覺丘BB嘅抖氣聲好大，唔係好順，於是我就㩒鐘叫姑娘，但嚟嘅只係平時幫手清潔派飯嘅姐姐，我同佢講BB抖氣唔係好順同有啲鼻水咁，佢竟然好平淡咁話＂有鼻水咪抹咗佢囉！＂然後㩒熄返我個鐘就走咗。。。我以爲好多B都係咁，但其實另一方面我好疑惑：一個剛出世嘅BB冇理由會咁快傷風㗎！？

如是者，嗰晚大部分時間我都同抱住丘BB瞓覺，享受做媽媽嘅第一晚！

到咗第二朝八點幾，丘BB開始不停喊，同之前好唔同，就算畀佢啜都不能安撫佢。最後，唯一令佢唔喊嘅姿勢係坐喺度！於是到咗九點醫生巡房時，我就講BB嘅狀況，姑娘即刻將佢推入護理房檢查，發現佢嘅血含氧量好低，要即刻瞓氧氣箱接受觀察，直到下晝兩點姑娘就話要將BB送上兒童病房留醫了。。。我即刻呆咗，有乜事要留醫咁嚴重呀？？？佢地話BB可能係因為出世時吸入胎水引致肺炎，所以要打抗生素…….

由於當時我的傷口仲未癒合好痛，所以就爭取時間休息同試唧啲奶畀BB食。等到五㸃嘅探病時間，老公就嚟用輪椅推我上兒童病房探BB。去到一見到丘BB插咗好多喉瞓喺氧氣箱入面，好心痛、眼淚不禁湧出嚟！佢先一日人仔，就要受啲咁嘅苦，真係好可憐。。。

之後連續七日都要住院插喉打抗生素，而我住咗三日就要出院。