勁迷囝囝變癡母 陳敏之唔想做怪獸

剛在冬至誕下囝囝雷子樂（乳名冬至）的陳敏之，坐月個半月終出關為主演的《親親我好媽》宣傳，劇中她演單親媽咪兼訓導主任「文嘉熙」，經常面對一班「怪獸家長」，現實的她坦承為免將來也變「怪獸」，已盡量事事不着緊，但對着超得意的「冬至」，她跟老公已陷入癡迷狀態，更打算追多個。

^敏之復工拍新劇《溏心風暴3》，劇中敏之飾演單親老師，幸好戲中囝囝已多次合作，勁好感情。

早在懷孕時，敏之已專登hea住做準媽咪，「我知自己性格比較緊張，又鍾意事事親力親為，所以專登Hea啲，陀到成7個月先至去買BB嘢，等自己可以放輕鬆心情，不過到BB真係出世，一樣係會手忙腳亂嘅。」

^由於「冬至」外形似足爸爸，敏之最想第二胎追個女。

打算追多個

始終是初為父母，敏之跟老公雷偉信縱然有家傭兼陪月幫手，剛開始仍會緊張，但實習了個多月已開始上手，更懂得享受箇中樂趣，「我哋望住佢一日都唔會悶，出街就想即刻返去睇佢，電話裏面全部都係佢啲相，我都擔心嚟緊開《溏心風暴3》點算，依家唯有少啲埋身餵奶，等佢習慣吓，但會堅持餵人奶。」

雖然敏之已變癡母，但工作狂性格不改，更不想成為「怪獸」，「老實講，兩個人搵錢梗係好過一個，同埋我真係好鍾意演戲，做咗媽咪演出彈性可以更大，又唔想成日將個焦點去晒囝囝到，甚至變埋『怪獸』，所以有諗住等囝囝大啲再追多個，到時都唔會做全職媽咪，最希望兩方面都可以兼顧到。」

^敏之笑指老公對囝囝的癡迷程度比她更甚。

採訪、撰文：杜淑霞 髮型：Eve

化妝：Jessica Chan 服裝：ST.STUDIO

頭條日報授權轉載