【慈慧幼苗】孩子車廂搞搞震,爸媽故意忽視真係work?
2017-04-07
今日放假,約咗朋友去行山。晨咁早一身武裝去搭地鐵。
車廂無乜人,搵個靚位坐低。對面坐咗對母子。媽媽喺度睇手機,阿仔就裝裝吓,一時又望吓媽媽。(我心諗:媽媽唔理佢,阿仔一陣實有搞作。)
說時遲那時快,阿仔已經瞄準那條扶手柱,喺度又爬又轉,當正車廂係遊樂場。
媽媽望咗佢一眼。嘩!勁,媽媽竟然若無其事。 (我知!我知!你想故意忽視。)
阿仔跟住走埋媽媽度,撩吓媽媽嘅衫袖同頭髮。好明顯,佢想媽媽注意佢。
呢個時候阿媽終於出手,佢攬吓摸吓仔仔,然後再玩手機,仔仔再撩佢,佢又再摸吓仔仔。(之前明明想故意忽視佢,但你又忍唔住。)
呢啲愛理不理嘅態度,仔仔又點可能滿意呢!最後仔仔使出終極殺手鐧 — 花式滾地。
我忍唔住望吓阿媽,我哋四目交投,阿媽雖然好尷尬,但繼續用一招「錯誤版故意忽視」去擋架。搞到我呢個晨運行山客都替佢兩母子辛苦。
解說
其實個案中嘅媽媽只要有事前準備,安排合適嘅活動俾仔仔 (尤其當車程比較長嘅時候),便可防止阿仔找麻煩解悶。此方法聽落好似好簡單,不過當中都需要一啲技巧。
首先,家長可以帶備幾本益智圖書,等小朋友可以在乘車時睇;又或者帶一件只有出街時才玩嘅玩具,是平時喺屋企唔會有得玩嘅玩具,咁樣先可以吸引小朋友在車廂內坐定和專注咁玩 (因為平時玩唔到)。
第二,要同小朋友約定規則,講俾佢知正確嘅行為係乜,做到就會點,做唔到又會有咩後果。
第三,媽媽如果要用故意忽視呢招,就要堅持,唔好時不時就俾咗啲反應仔仔,咁樣已經廢咗武功,唔work喇!
不過,如果媽媽唔係長時間自己睇手機,藉著乘車時間與小朋友傾吓講吓,一齊看圖書,亦能避免發生車廂鬧事的情況!
個案及解說由慈慧育兒社工 KaKa提供
慈慧幼苗互動資源平台babyparent.org,教你把握小朋友6歲前嘅黃金期,由香港理工大學同香港大學【教兒樂】專責社工主理育兒管教環節,香港大學李嘉誠醫學院兒科教授負責嬰幼兒醫護範疇,滙聚資深教育心理學家同言語治療師等,為你提供免費同及時嘅專業解答。
歡迎你like我哋Facebook Fan Page:Healthy Seed Parenting。
其他文章: