【慈慧幼苗】曳都有得預防？
2017-06-30
上星期六去了某廣場書店買書，之後去了間cafe邊飲咖啡邊睇書。不久，看見有位手抱著BB的女士坐在隔離枱，只見她提著電話說：「我帶住兩個仔都出嚟聽你訴苦，就知真係friend啦，你一出電梯就會見到我哋，一陣見啦！」一個湊兩個，細佬睇落得兩歲，哥哥約四歲，近年都少見有媽媽「一拖二」出街，暗暗佩服她呢。
媽媽的朋友來到，媽媽的注意力都轉到朋友身上，哥哥想將手上的橙汁遞給細佬喝，媽媽說了一句「No！坐定定！」，哥哥只好繼續自己飲橙汁。見冇嘢做，哥哥就趁媽媽不為意時，在店內閒逛「參觀」，一時拿起咖啡杯看看、一時又走去拿咖啡糖，媽媽就大聲罵哥哥說﹕「你搵日坐得好啲，好唔好呀？！」。哥哥於是回到位上，再將果汁遞給細佬喝，細佬喝了兩啖之後被媽媽發現：「你冇耳性架？都話唔好俾細佬飲！細佬咳緊，你係咪想佢病多幾錢重？！」哥哥垂頭喪氣安靜了一會，之後攞住自己同細佬的飲品乾杯玩，媽媽見到便一邊收走埋飲品，一邊話哥哥：「你唔好搞嚟搞去好唔好？」哥哥寂寞的表情看在我眼裏都為他心傷，不知道他的媽媽是否看到這一幕呢？
解說：
個案中的哥哥第一次想將手上的橙汁遞給細佬喝，媽媽指令係「No！坐定定！」。這個指示很不清晰，到底「No」係「唔好俾細佬飲」還是「唔可以離開座位」呢？如果家長講「細佬病緊，你自己坐定定飲啦。」指示便既清晰又正面了。
另外，相信很多家長都試過湊住小朋友去同朋友飲嘢傾偈，但你又有冇諗過當你好開心咁同朋友傾偈時，你嘅小朋友其實都會幾無聊？了解孩子的家長會知道要求小朋友「百無聊賴」坐在一旁，再強的專注力都會感到很納悶，自然會想周圍逛逛，「坐唔定」的都好正常！建議家長可預備一些益智又有趣的活動 (例如﹕摺紙、連線、看書、貼紙等)，幫助小朋友減少因為無聊而做出不當行為。正所謂預防勝於治療，家長眼中小朋友的不當行為，可能是因為家長的準備不足所至，家長反而要多多準備，時刻檢視。
個案及解說由慈慧育兒社工Ka Ka提供
慈慧幼苗互動資源平台babyparent.org，教你把握小朋友6歲前嘅黃金期，由香港理工大學同香港大學【教兒樂】專責社工主理育兒管教環節，香港大學李嘉誠醫學院兒科教授負責嬰幼兒醫護範疇，滙聚資深教育心理學家同言語治療師等，為你提供免費同及時嘅專業解答。
歡迎你like我哋Facebook Fan Page：Healthy Seed Parenting。
作者：慈慧幼苗
相關文章：