【湊仔爸與返工媽】亂噏當親子秘笈
2017-09-21
孩子的說話,很多時都充滿童真。內容全沒邏輯,也可以理直氣壯的說出來(即是亂噏)。大人究竟應繼續瘋狂對話,還是把握機會糾正呢?以下是早前阿豬媽兩母子的對話(節錄):
豬:媽咪,我自己去海洋公園喇。
媽:去海洋公園做乜?
豬:去睇醫生呀。
媽:哦……去海洋公園睇醫生……點解要睇醫生?
豬:因為我瞓著咗,跟住呢我就起身,媽咪返咗工,我就自己去海洋公園睇醫生喇。
媽:哦……咁你去幾耐呀?
豬:十分鐘。
媽:十分鐘咁耐?我會好掛住你㗎喎。
豬:(低頭,忽然細聲)我唔會掛住你㗎喎。
媽:……你搭咩車去呀?
豬:我自己揸車呀,揸七人車。
媽:你自己揸?你幾時考咗車牌㗎?
豬:我而家考車牌囉,可以學揸車㗎喇。會好小心,慢慢……停!咁樣。
媽:你揸車去,知唔知要行咩隧道呀?
豬:城門隧道囉。
媽:………咁你去到,架車打算泊邊度呀?
豬:停車場囉,入錶呀!
其實……
去海洋公園不能睇醫生;
十分鐘應該去不到海洋公園;
由屋企去海洋公園不會行城隧;
小朋友不能考車牌;
海洋公園停車場不用入錶……
若要為以上對話指出錯誤,還有很多很多。可是,一旦指出,這段有趣的親子對話就會即時中止,變成大人「唔係咁,係咁咁咁」的教導時間。而孩子感受到的,可能只有「我又講錯嘢」的挫敗感。
阿豬媽通常喜歡順著孩子的思路進行不著邊際的對話,讓孩子先盡情分享生活經驗,天馬行空,親子雙方都享受平等而有趣的親子時間。當中有關邏輯/資料/概念而又無傷大雅的瑕疵,就默默記下,適當時再處理都未遲。
若孩子享受跟大人相處的時間,建立互愛互信的關係,教導的機會就很多。
若大人只著眼每分每秒挑錯和糾正,教導的機會反而變得愈來愈少。
作者:阿豬媽@湊仔爸與返工媽
其他文章: