鴻爸爸的自然法則

上回講到，我地家有個好不負責任的鴻爸爸！
一講到爸爸，
好多BLOG友都不約而同地向我大吐苦水……
哈！男人天生就同女人有著不一樣的構造。
基本上，十個男人，得一個半個係願意為仔女上刀山、落油鑊架咋！
各位媽媽，睇開少少啦……
爸爸們係你地另一個仔，係需要時間慢慢成長的！

講起爸爸，
有時，我真心好佩服鴻仔爸爸！
佢總係咁漫不經心，乜都唔緊唔要的。
例如，佢唔會理阿仔佢完成功課未。
通常，佢會問朗朗：你做好功課未呀？
朗朗：做左啦……
就係咁，佢就當朗朗已經完成功課。
完全唔會check，睇都唔會睇一眼！
結果… 真係嬲……每一次都會有同一個下場！
當我番到屋企，check功課時，
就會發現… 哥哥係乜功課都冇做過架……

有時，真係好激氣佢！點解佢可以乜都唔理！
但俾佢講多幾句，就發現佢係有佢的道理。
小朋友嘛，佢有責任自己完成功課，
唔係下下俾人管住，先識做！
佢會覺得，佢唔做，咪由佢囉！
反正，番到學校冇得交，要向老師交代果個係佢！
你管住佢，佢只會覺得你煩咋……

又有時，佢會同阿仔一齊上Youtube睇Bigbang
見到就…唉！好把鬼火…
人仔細細，個個小朋友都唱ABC song架啦…
我都未見過有小朋友會唱Bigbang的歌架…
但我同你地講，細佬三歲半人仔，
已經唱到Loser, We like to party, Fantastic baby 呢D Bigbang名曲啦！
見佢地唱K-pop…… 我真係由心的扯火起黎！
不過，爸爸有爸爸的教法，
因此，佢地認識左唔同的文化；
又因為爸爸，仔仔對韓國、跳舞都充滿興趣！
我真係又奈爸爸唔何……

又有一件讓我覺得好神奇的事：
仲記得，哥哥四歲左右，
我就開始要爸爸帶佢去洗手間。
有幾次番到屋企，都發現朗朗條底褲仔有poo poo積。
我於是質問爸爸，問佢點解抹pat pat抹到咁污糟！
鴻仔於是大叫冤枉：「佢自己抹得唔乾淨，關我乜野事喎……」
原來，鴻仔佢… 唔想再幫人抹pat，
佢覺得自己生出黎，唔係幫人抹pat架……
亦認為替人抹pat係極侮辱！
於是，佢下好決心，要教朗朗自己抹！
當時，媽媽心態就係：佢四歲咋，隻手邊夠長抹pat姐？
又覺得，爸爸自己唔想照顧個仔，係度多多事實，又一次勁嬲呀！
點知，不出兩個月，
哥哥竟然學會左自己抹pat，
以後，就再冇煩到我地啦！

自此，我就覺得男女大不同！
男人教仔法雖然係闊佬懶理得讓人勞氣，
但認真的，我發覺小朋友跟住爸爸去成長，亦會有所得著。
而且，佢地的得著亦唔係少架喎！
有時，女人真係要向男人多多學習，
教育小朋友真的唔需要過份緊張，
放鬆D啦，各位媽媽！

作者：80後媽咪遇上10後Baby