激罕談家事　劉德華：我屋企好溫暖

剛度過54歲牛一的劉德華超開心，除家有賢妻朱麗倩默默支持，及超級可愛的3歲囡囡劉向蕙(Hanna)向他大唱生日歌外，更憑電影《解救吾先生》贏得「金絲路」傳媒榮譽年度「最佳男演員獎」。事業、家庭兩得意的華仔難掩興奮心情，接受本報訪問時停不了的笑，更破例談家庭。因為家庭美滿、父母身體又健康，最重要是入行35年，仍處於頂級位置，所以華仔多次強調「非常感恩」。

有老婆、有囡囡、有獎攞，仲要有份投資，仍上映中的台灣電影《我的少女時代》大收近4億台幣（約九千四百萬港幣），54歲的華仔理應可以逐步淡出享受生活，但我們的華仔依然嚴選劇本努力拍戲，角色更時有突破，像在新片《解救吾先生》中便飾演被綁架的吾先生（明星吳若甫），拍攝時幾乎有90%時間都被鐵鏈鎖在不足一平方米的空間內，手不能動，身體亦只能輕微向左右傾。重提片中幕幕催淚畫面，華仔理性地分析：「其實吾先生真有其事，佢喺被綁嗰20幾個鐘頭入面冇理由每秒都處於緊張狀態，當中有放棄過，亦有不斷重整自己嘅價值觀。我拍緊嗰陣都有諗過如果第時俾人綁架會點，係咪應該重整一次生命價值觀？（語畢即講Touch Wood），我希望到時都可以冷靜面對。」問到華仔如處於生死之間，腦海會浮現甚麼影像？華仔兩秒即答：「我成日諗住返屋企咋，每個男人日日喺出面做嘢10個鐘頭以上，返到屋企係最溫暖。」問華仔是否同樣擁有一個溫暖的家？展露招牌笑容的他坦言︰「我（屋企）好溫暖呀。」

囡囡被全城激讚可愛

導演丁晟披露受害者吾先生綁架事件後變得重視家庭，沒有工作就留守家中變成宅男，一家三口現過得好快樂。語畢，華仔主動追問導演，「吾先生係咪得一個女？女兒多大？」得知吾先生跟他一樣有一名女兒，華仔大笑說：「我同吳若甫一樣，自己當然好幸福啦。」問到華仔事業、家庭兩得意係咪好圓滿？極少談家事的他答得老實：「其實自己算係一個幾值得羨慕嘅藝人，工作上，有幾多個（藝人）可以捱到咁耐吖，而屋企，父母身體各方面都屬水準以上，所以我好感恩！（剛度過嘅生日係咪最開心？）哈哈！好多開心嘢嚟緊！（追仔有好消息？）唔係，你想像力太勁嘞！」之前《東周刊》影到華仔在54歲生日會上抱住愛女切蛋糕及唱歌，超級可愛的Hanna就一直嗲住爸爸，溫馨照曝光後，囡囡被全城激讚「萌爆」，華仔聞言，笑笑口得戚地「哼」了一聲，又抵佢招積嘅。

導演有嘢講

問到《解救吾先生》的丁晟導演為何會選華仔演吾先生一角，丁導演話，華仔是他的偶像，而角色亦需要大明星來演，劉燁在國內好紅但名氣卻比不上華仔，而且華仔形象健康，沒有任何負面新聞。導演更大讚華仔原來不獨帥氣，戲還好，國語台詞又符合他要求，角色別無他選，只有華仔！導演讚口不絕，睇過劇本後自薦演出的華仔風騷地大笑：「最初導演以為我得個樣。哈！」不過，華仔表示都有賴遇上一班好演員，尤以飾演綁匪的王千源，一臉強悍兇狠，不論表情和樣子跟以前所演的角色好唔同：「佢係藥引，搞到我都好快跌落個角色入面，演出時真係驚㗎。」

轉載自星島日報