【湊B不忘行善】鄺文珣帶仔仔訪內地孤兒 培養感恩的心
2018-02-07
剛再誕一女的鄺文珣 (May),早前與丈夫 (Andrew) 及2個仔仔出席一電影院的活動,為一親子比賽擔任嘉賓,順道跟他們看電影。近排忙於湊女的May,早前帶兒子探訪內地孤兒,希望能培養他們有感恩的心及使命感,她更表示因香港讀書壓力大,不排除安排他們到加拿大升學。
鄺文珣話唔排除安排子女到海外升學。
May表示,「產後雖然好忙,但都想多啲出席公開活動,同埋跟本港的中小學合作,舉辦不同類型的活動,希望香港的小朋友明白到我們的生活條件及物質都較內地一班孤兒好。」
哥哥好識關心人,兩兄弟感情好好。
堅持餵母乳 感恩家人體諒
湊女親力親為的May,產後湊女絕不假手於人,而且堅持跟之前2次做媽媽一樣餵母乳。
「再做媽媽既驚喜又忙亂,始終都有幾年無生B了,不過我深信船到橋頭自然直,無論是照料上或是餵母乳方面。由於開刀傷口痛,初初餵囡囡Chesney母乳都幾辛苦,好彩家人都好體諒,丈夫仲不時鼓勵我,同埋湊B以外的所有事情,佢都幾乎同我處理好晒!另外,大仔Cadence試過唔出街食最愛的日本菜,留家陪我食陪月餐,用行動嚟支持我,真係令我好感動!」
2個哥哥都好鍚妹妹,出咗街都會打電話返嚟問妹妹做緊咩。
「大仔性格比較圓滑啲,所以會關心人多啲,至於細仔可能年紀尚小,思考就無大哥咁周全,不過佢哋都好相親相愛,依家仲會關心埋妹妹,好鍚妹妹,出咗街都會打電話返嚟問妹妹做緊咩,幾窩心嫁!」
對於日常照顧及教養,May表示唔會過分催谷佢哋,崇尚自由發展,但做錯事都會體罰。
「照顧兩兄弟唔算困難,不過佢哋都有調皮或者唔聽話的時候,所以適當的體罰係起到警惕作用,我哋亦要好清楚唔係因為想發洩所以打佢哋,等佢哋明白做錯事係要承擔同埋受罰。」