【虎羽有云】顯微鏡看母乳體驗分享
2018-03-22
今日係芊羽8個月大，亦係一個全人奶足8個月嘅BB喇！
因為唔知哪來對餵哺母乳嘅堅持，我得到咗好多寶貴嘅回憶，芊羽唔小心甩嘴令奶柱噴到佢成塊面都係嘅笑料，或者係佢食飽飽瞓著咗都依然吸啜嘅睡臉，都成為咗Wilma媽腦入面列入我的最愛嘅片段。雖然作為一個在職媽媽，餵人奶呢個選擇確實比較困身，因為要趕返屋企埋身，真係連OT都要plan㗎！（感恩同事無限包容）但係俾我再揀過，正所謂「最好給最愛」，我都依然會選擇成為一個在職母乳媽媽。
好多人都知道餵飼母乳嘅強大優點，當中包括佢複雜而且無可取替嘅成分。而我哋成日聽嘅「活性細胞」，又到底係咩嚟呢？
上個禮拜，我就去咗The White Rabbit – Handmade 母乳飾品做顯微鏡下觀察母乳成分嘅體驗。
預約咗時間，店主會先聯絡你詢問到時會帶雪奶定現擠，咁懶惰嘅媽媽我，就選擇咗去到先手擠嘅。
同芊羽去到小店，店主帶咗我同芊羽去另一間獨立嘅舖位安頓。呢度麻雀雖小，但就有一個餵奶嘅地方，而我就喺呢度即場將母乳，手擠到一個店主預備嘅小杯。(目測需要嘅容量好少好少，2-3ml都夠)
完成後，就大聲呼叫店主返嚟吧
店主姐姐會協助你將你嘅母乳，抽取小滴到顯微鏡嘅玻璃片上，再調較至1600倍，好快就可以睇倒你充滿動感嘅活性細胞獨立跳動喇
呢個時候，店主會離開，俾你有空間慢慢觀察嚟自自己身體嘅奇妙，我睇咗二十分鐘，就完成咗今次嘅體驗喇。
如果大家對於自己嘅人奶都好似Wilma媽咁充滿好奇，不妨向佢地查詢詳情呢
*服務可以加購USB或者雲端片段，而店主係唔hardsell㗎~就算唔加購，都會即場有一張紀念相片連紀念卡同埋會有一段剪成20秒嘅短片留為紀念，非常精美
*不過請體諒店主唔係醫護人員，唔好問有關人奶個分子係咪活躍等等學述性問題為難佢哋呢
作者：虎羽有云- Wilma & 小虎日常