【開學教材分享】中英認字訓練、學校回條通告收納好幫手
2018-07-06
今年和牛B即將入讀K1幼稚園啦，到底K1會學啲咩嘅呢？作為媽媽嘅我，一啲頭緒都冇，加上無讀N班嘅關係，我真係零概念。而我只知道和牛B入讀嘅學校，會喺K2先開始學執筆寫字。
語言方面，和牛B絕對無問題。所以我就開始著手，加強訓練和牛B認字。
廣東話 (中文)係我哋嘅母語，所以我會重點教育佢。
而英文當然都好重要啦，香港人精通廣東話、英語及普通話嘛。
所以，我就喺屋企整定個中文、英文認字卡掛袋。
閒時俾佢睇下、玩下、認下，唔強迫佢學。
係因為唔想佢對文字反感，感到反感之後，就會無晒興趣仲會影響日後學習情緒。
所以，我自己整咗一啲我想佢學嘅簡單生字同埋字句俾佢玩。
