【許許與小BELLA】幼兒健康小食: BB版迷你蔗蝦
2018-07-23
今次整咗 “BB版迷你蔗蝦”！
其實呢個版本有少少變奏，
去迎合阿囡嘅歲數，
最初真係想用蔗嫁，
不過我想俾佢拎住食係食到落肚，
最後我用咗鮮淮山代替。
淮山健脾益胃，
好適合煲粥仔俾BB食，
但除咗煲粥，
不如試下釀舊蝦滑喺中間啦！
由於佢比薯仔硬D，拎起身唔會散，
但又粉又易咬，釀埋蝦滑就無咁潺易拎D，
口味仲比起淨食淮山豐富好多。
舊蝦滑，我唔係用晒全蝦做嘅，
而係加咗D豬肉碎同粟米，
未食得蝦嘅BB用全豬肉來做一樣好食，
蒸完食得，又或蒸完再略煎也可！
<<幼兒健康小食: BB版迷你蔗蝦>>
材料：
鮮淮山一小枝
中蝦仁6隻（我用急凍的）
免治豬肉一湯匙
粟米粒少許
粟粉一茶匙
做法：
先帶好手套以免直接接觸淮山皮，
否則皮膚會痕癢，然後把鮮淮山去皮，
切條，大約與BB的手指粗度差不多便可。
用少許鹽水浸住淮山條以免變色。
把已去腸蝦仁，豬肉及粟米粒一起blend成蓉。
準備做蝦膠，先加入粟粉混合。
在大碗中順時針攪拌蝦滑10次，
然後再“畢起”整舊蝦滑再撻回碗中，
來回數十次，目的迫走中間空氣，令蝦滑結實。
釀蝦滑，淮山條可先過水沖走鹽水，
吸乾，運用保鮮紙包裹可按得較實，
同時又可避免淮山的黏滑，會容易包好多。
確保整舊蝦滑沒有裂縫便可。
隔水蒸，水滾後中大火蒸8分鐘，再轉細中火蒸2分鐘。
蒸完後的迷你蔗蝦便可給BB拎住食。
喜歡的也可像我一樣，
在平底鑊中加些許油略煎，
因為Bella太喜歡食香口食物了！
送俾大家《迷你BB蔗蝦》，
希望各位BB喜歡，
下次再做特色BB料理，
記得留意我哋facebook更新喇！
************************************************************************
~ 許許與小BELLA ~
隨性的玩樂型媽媽~ 喜歡做BB特色料理~ 愛分享BB好物情報~
記得留意我地FACEBOOK瀏覽更多玩樂情報及BB食譜啦~
FB專頁: www.facebook.com/huihuiplayground
聯絡我們: jassmine_tea@yahoo.com.hk
作者：許許與小BELLA