【Scientific Papa】龜兔賽跑，原來係隻豬贏咗？！
2018-08-19
話說筆者每晚都會在大女兒睡覺之前講故事，但係講邊一個故事，通常都係個女話事，當然筆者有時都會反抗。
不過，當面對佢最鍾意嘅《龜兔賽跑》同《三隻小豬》呢兩個故事，筆者真係講到「口臭」！上星期有一晚，女兒臨瞓前又叫筆者講《龜兔賽跑》⋯⋯
筆者：「前晚先講咗《龜兔賽跑》咋喎，又講？」
女兒：「咁講《三隻小豬》啦！」
筆者：「咪上星期五晚講咗囉！」
女兒：「咁講《龜兔賽跑》啦！」
睇嚟筆者都難逃一劫，又要講一次呢兩個故事，但向來唔喜歡沉悶，筆者只好發揮創意，將《龜兔賽跑》同《三隻小豬》呢兩個故事crossover！
《龜兔賽跑》講到兔仔驕傲嗰一節，兔仔原來冇瞓覺，去咗同三隻小豬嘅豬大哥玩喎，跟住佢同豬大哥及豬二哥一齊逃避大灰狼嘅追捕。當佢哋走到去豬三弟嘅屋企時，就遇到跑跑吓迷咗路嘅烏龜，於是佢哋一齊入咗豬三弟嘅屋企，然後大灰狼嚟到，當然係吹唔爛間屋啦！於是佢哋喺屋企，等到大灰狼走咗，就決定一行五隻動物一齊賽跑，最後兔仔為咗等埋烏龜呢個朋友，於是個比賽就被好勤力嘅豬三弟贏咗啦！
嗰一晚，個女聽完呢個咁有創意嘅故事，當然好滿足咁樣瞓咗覺啦。呢件事，亦令到筆者決心將唔同嘅故事crossover，例如將《金銀鐵斧頭》同《狼來了》crossover咗、《城市老鼠和鄉下老鼠》就同《鳥、獸和蝙蝠》crossover！