金馬影后林嘉欣拒做怪獸家長

曾獲得金馬獎女配角獎的林嘉欣今年以《百日告別》獲得最佳女主角。這部電影故事起源於導演林書宇的親身故事。3年前，與林書宇相守12年的妻子逝世，巨大的哀傷，令林書宇決心將他對妻子思念的故事拍成電影。

林嘉欣則說，當初會答應接拍，是因為林書宇的一封邀約信：「我覺得導演很誠實而勇敢，甚至當時連劇本都還沒看就答應演出了！」已為人妻、人母的林嘉欣，恰如其分詮釋了劇中喪偶的妻子。

入行14年，37歲的林嘉欣（Karena）曾獲得「最佳新演員」及「最佳女配角」獎，前途本來無限！2010年，Karena突然告別影壇，三年抱兩，女兒分別4歲多（Kayla）及1歲多（Sofie），由當紅演員轉做賢妻良母，日日閉關煮飯、湊女，卻依然樂在其中，連她也忍不住自嘲：「喺藝人之中，我都算係最窮，我承認㗎，以前唔會為錢而接唔想拍嘅戲，家陣又以家庭生活為重，咁樣做對小朋友正面好多，絕對唔係自我安慰嘅說話！」

拍喜劇玩突破

雖然她好享受做媽咪，但無意放棄演員這份工：「坦白講，演藝係我終生職業，除咗做演員，我都唔知做乜好！所以呢幾年就算我冇演出，但個『摩打』都冇停過，我一直不斷去學習，好似上黃秋生、甄詠蓓嘅戲劇班，做好多功課，只要遇上適合嘅劇本都會演出。我覺得做咗媽咪後得到更豐富同埋踏實嘅生活體驗，戲路更廣！我唔想被定型做媽咪角色，反而想嘗試做喜劇同埋一啲騎呢角色去突破自己，畀人全新嘅感覺，再拍文藝電影、驚慄片經已冇新意。」

幸福爆燈家庭

講到家庭，嘉欣笑不攏嘴：「做咗媽咪後體會到愛係冇保留，我對佢哋無限付出，但唔會覺得係犧牲，呢份愛，當然包括埋我老公，能夠有一個親密關係唔容易，佢係我好朋友兼親人，亦係好欣賞嘅人，就算出面有幾亂，有佢喺度我個心好安定，佢係我精神支柱，佢知道表演帶畀我好大快樂，所以唔會反對我復出，但千祈唔好話我幸福爆燈，最怕俾人話我晒命，總之係正常踏實咁生活，建立一個和諧家庭，我會接送囡囡返學，講故仔?佢哋瞓覺，仲會親自煮飯畀老公食。以前只會專注事業，真係冇諗過會三年抱兩，事情埋到身就會自自然然咁做，做最啱自己嘅嘢。」

教曉女兒珍惜

林嘉欣強調自己唔係怪獸家長，她注重女兒的品格發展大於學業成績，所以冇揀選讀名校或貴族學校：「我唔想囡囡接受填鴨式教育，最怕小朋友為父母去讀書，我會將讀書責任交畀佢哋，由佢哋自己執書包。」她更強調，唔會努力搵錢協助兩女將來置業，相反離世前盡量花掉所有身家，這樣才教懂她們如何珍惜，就算玩具都不會隨便買，她會叫囡囡跟心儀玩具講拜拜，然後放下離開。

部份內容節錄自: 頭條日報

Oh!爸媽編輯部整理