張晉談家庭：我好幸福
2015-12-10
由甄子丹、張晉及熊黛林主演的《葉問3》將於今年聖誕黃金檔期上映，「最佳男配角」張晉坦言拍此片有好大得著，「可以同甄子丹交手固然過癮，故事亦對我嘅生命有所啟發。」回到現實，張晉放閃：「我嘅生命屬於老婆、兩個女同父母嘅。我有一個好家庭，事業又有起色，上帝對我好好，我好幸運，更加好幸福！」
《葉問3》最後一幕中，張晉同甄子丹以六點半棍和八斬刀過招，預告一出，短短10小時已吸引近100萬次瀏覽，逾5萬人讚好，「拍呢部戲真係好辛苦，唔係拳來拳往咁簡單，因為前兩集珠玉在前，第3集要突破唔容易，既要突出詠春特色又唔可以天馬行空，亦唔能夠用鏡頭借位，之前我對詠春認識唔多，為演好詠春高手角色特地苦練3個月，至少睇落去似模似樣，呢個係演員嘅責任。因為詠春通常用拳腳，但今次就要用八斬刀同長棍，枝棍有成九呎長，揮耍時又要講求速度，都幾吃力㗎！」
心理質素的重要性
面對「宇宙最強」，自言是平凡人的張晉唔算好大壓力，他一臉輕鬆大笑說：「因為丹爺對我好好，反而角色方面就有小小壓力，因為導演對我有期望，好記得第1日開工未拿捏到角色，拍咗成日都浪費咗，開工第2日拍到第3個鏡頭，導演先話OK。我相信演員係要狀態嘅，而且我經過電影《一代宗師》之後心理質素好好，王家衛磨煉到我接受重覆又重覆嘅拍攝心態。」
對於跟甄子丹合作，張晉強調無壓力，「好彩我同丹爺不論動作節奏同速度方面都好夾，我更加佩服佢嘅動作才華真係體會到成功唔係僥倖。」