【莎倫媽媽】書展開門七件事
2019-07-14
今個星期三就係一年一度的書展,相信大家都蓄勢待發,準備一擇千金買筍嘢。 入場前提提大家幾樣嘢,就會筍上加筍﹕
(一) 幾時去最抵?
第一選擇緊係中午12:00前入場啦,成人門票只收$10,比正價$25平一半有多,離場時間又冇限制,睇到幾點都得。 星期六日都一樣有優惠,但記住呢隻門票只能現場購買。
第二選擇就適合啲放工先去到的爸爸媽媽,就係要在頭兩日 (即17-18/7,星期三、四) 入場,雖然都要比$25,但呢兩日正價門票可以憑完整票尾在星期五六日(即19-21/7),下午5點後入多一次,$25入兩次都算抵。 以我話就第一日放工入場先買超長人龍的補充同睇自己嘢,星期六日先再帶小朋友入場同佢哋睇嘢。
(二) 邊度買入場票最筍?
如你要12:00前享用$10票,就一定要即場買。 如其他時間去,可以便利店買定,但最抵係用ALIPAY HK個APP買,每張平$5呀。