【玩謝囡囡】日日Cosplay 李亞男爆祖藍湊女有挫敗感
2019-08-09
李亞男去年12月為老公王祖藍誕下得意囡囡天韻(Gabrielle),慶幸 Gabrielle遺傳了她的身高和靚樣。7個月大20幾磅的她樣子可愛,面仔「脹卜卜」被封為「倉鼠妹」;搞到亞男當正她是玩具日日喪玩Cosplay,更直言:「阿囡都好慘,畀我哋玩謝咗」。
不過 Gabrielle 性格比較cool,令身為新一代笑匠的祖藍要扮鬼扮馬先氹到囡囡開心笑,很有挫敗感。可見亞男更樂見老公為囡瘋狂,笑指:「我除咗整啲好嘢食留住老公個胃,要生多幾個留住佢個人啦!」講明已準備好為祖藍再添丁。
^亞男(左)好感恩囡囡(右)似足自己,「同我細個個樣都幾餅印,好神奇,望住佢好似見到細個嘅自己。」
亞男言Gabrielle出世後,令一家人好開心,多了很多笑聲,「我依家成日幫佢換衫,啲朋友又好好送啲衫畀佢;好似扮士多啤梨咁,我日日幫佢影相。她表示女兒已成為自己的玩具,趁她現在甚麼也不知道,更要盡情玩。亞男形容女兒經常流口水,又肯給父母二人瘋狂錫;即使半夜起身飲夜奶,女兒也需要和她玩。
她指出:「個女都好慘,俾我哋玩謝咗,但佢個樣好cute,好似倉鼠個嘴含住好多瓜子咁,塊面有好多骨膠原,我哋叫佢『倉鼠妹』,係姑姐(祖藍妹妹)幫佢改。」
^亞男當Gabrielle玩具玩,其中一個傑作就是幫佢扮士多啤梨。
^亞男每日都幫Gabrielle換裝,呢兩款一樣咁cute
Cool爆囡囡唔易O氹
雖然Gabrielle還小未懂得反抗,可以給亞男任玩;但cool cool的她就不容易笑,令到亞男和祖藍要出盡法寶扮嘢,「佢喺我個肚度老公拍緊音樂劇(《你咪理,我愛你!》),佢一聽歌就踢我,佢個天韻都係咁嚟,依家都成日畀佢聽啲好音樂,佢扭緊計有音樂都會安靜啲。」
亞男也稱女兒沒耐性玩玩具,喜歡別人與她說話,是需要互動的。亞男不甘透露:「俾佢玩一日好倦,我同佢一齊睇書,教佢讀啲生字,仲要扮埋嗰啲動物,佢先會有啲特別反應。佢又開始模仿我哋表情,好似嘟嘴咁,佢啲神態似我老公,但好彩佢個樣同身高似我,我贏咗,神態就由佢啦!」
她又指出,女兒性格雙方也似,比較文靜帶點cool;需要出盡力才能笑,令祖藍覺得沒存在感。她言:「要睇佢本小姐心情先會笑,我同老公會成日扮貓扮狗叫,好低能嘅嘢出晒嚟去氹佢開心。」
她坦承有了Gabrielle,令祖藍更黐家,「有啲時間爸爸喺屋企多啲,或者半夜同佢玩多咗,佢又會同爸爸熟啲,反應多啲,所以祖藍唔敢飛得耐,生多兩個佢可能會唔飛!除咗整啲好嘢食留住佢個胃,要生多幾個可以留住佢個人呀!哈哈!佢以前收工都會即趕飛機返嚟,有咗阿囡之後佢就更加趕返嚟,中途仲要我畀阿囡啲片同相佢止渴。其實我哋拍拖時,仲係曬相年代,佢會攞住我張相睇完擺喺牀邊先瞓,好似幾好笑又好浪漫,不過暫時我同佢電話啲相都係阿囡行先。」
^祖藍和亞男輪住O氹囡囡笑,有片為證好花精力㗎!
^祖藍見到囡囡就黐到實唔肯放手。