【柯豬媽媽】香蔥餐包

柯豬媽最近愛上整麵包，愛嘅程度係1星期内整左3次

是咁的，偶然網上見到一個香葱餐包嘅食譜(https://icook.tw/recipes/162369) , 膽粗粗跟住份量整一次，我有更改部分做法因為無大型嘅攪拌機。經過3次試驗，柯豬媽整理好步驟同大家開心些呀！

麵包材料：高筋麵粉300g, 無鹽牛油30g, 黃糖2茶匙，鹽 些少，乾酵母3g, 全脂奶200g

些少橄欖油 (塗抹用)

雞蛋1隻+些少水 (用黎做egg wash查麵團)

1. 將牛奶加熱至啱啱夠溶牛油嘅溫度(~40℃), 連埋牛油，糖及酵母拌勻，備用。

2. 準備一個大碗，將麵粉同鹽撈埋一齊，喺中間挖個窿，倒入(1), 再用隻匙羹攪拌到大致成團。

3. 將(2) 倒喺灑左麵粉嘅工作枱上搓，一邊以掌心將麵團向12點方向推，另一邊手向反方向拉，搓到咁上下可以攤下個麵團。如果太濕太痴手，喺搓嘅時候灑多啲麵粉。只要搓到唔痴手就可以。

4. 喺剛才嘅大碗內塗一層橄欖油/其他植物油，麵團表面同樣查少少油，將它放回大碗&蓋上保鮮紙，放置喺溫暖嘅地方(e.g. 焗爐/微波爐) 發酵2hrs。柯豬媽放杯滾水喺碗傍，可以保溫同保濕。

5. 2個鐘之後麵團增大約1倍，跟住將它倒喺灑左麵粉嘅工作枱，用手掌壓平，再用刀仔平均分做6-8份。將分好嘅小麵團滾圓，平排喺焗盤上再發酵1hr. (小麵團之間要留2cm空間)

6. 準備一隻蛋，約略發勻循再加些少水 。用掃將egg wash掃喺發酵好嘅小麵團表面，再放入預熱180℃嘅焗爐焗22-24分鐘左右，中途轉一轉焗盤位置幫忙均勻受熱。

PS. 只要整好個麵團，想做成咩口味隨心所欲，依個就係點解柯豬媽咁鐘意它嘅原因！柯豬媽試了喺包面加芝麻，用車打芝士/蘑菇粟米做餡，效果都非常好，麵包軟熟，大人小朋友都啱食！

作者：柯豬媽媽

相關文章：【柯豬媽媽】蕃茄海鮮Risotto