【馮志豐】含淚默書記
2016-12-15
跟老友聚會，我們的MEN’S TALK，早已從個人興趣提升到子女教育的戰略層次。
朋友的小孩從幼稚園剛升小一，功課多、遊戲少，彷彿由天堂移民到地獄。想想也明白，不到半年前，學校還是搓搓泥膠唱唱歌，現在天天拿擦膠鉛筆又讀又寫，實在難過。
現實始終要面對，學校要默書，做爸爸的朋友跟孩子在家溫習，看見孩子含淚默書，慘過死老豆，連簡單的字也愈寫愈錯，怎辦？
朋友忽發奇想：「仔！不如你做老師，爸爸做學生，你負責讀，爸爸默，好唔好？」兒子覺得有新鮮感，愁眉略為放鬆。於是爸爸極速做個乖學生，兒子講一句，爸爸默一句。
問題又來了。做老師的兒子發現做學生的爸爸，居然默書一百分！相比自己默書有半版字都不懂，挫敗感又來。爸爸以為做個乖學生榜樣，結果挫折了小老師。
忽然靈機一觸，爸爸叫小老師再讀，自己再默。這次爸爸學乖了，默書錯漏連篇，弄得小老師笑不攏嘴：「呢個字唔係咁寫！應該係咁樣！」這次易位教學，提高了兒子當老師的責任感，身體力行寫字記字，重拾學習樂趣。做學生的爸爸，開心得一額汗。
聽到這裏，我不禁對朋友肅然起敬：「辛苦嘞！爸爸！」同一樣是功課，扭盡六壬令它變得有趣，我不單欣賞他的變通，最欣賞的，還是他的心。
他對兒子不放棄的耐心。
作者：馮志豐
相關文章：