【小小豬】清甜滋潤無花果雪梨乾瘦肉湯
2017-02-05
依排喉嚨乾乾的，打開食材櫃見到上次買嘅一大包雪梨乾，所以飲湯癮又嚟，所以就簡簡單單咁煲過清甜又滋潤嘅無花果雪梨乾瘦肉湯啦！
雪梨乾可以生津解渴，雪梨本身係寒涼之物，但經過烤焗之後嘅雪梨乾就會潤而不寒，大人同小朋友都啱飲呀！
話明係簡單靚湯，材料只係需要無花果4-5粒、雪梨乾約大半碗、南北杏兩湯匙、薑四片及瘦肉約$30~
薑去皮切片；瘦肉洗淨汆水；雪梨乾及南北杏浸洗備用~
煲內放約3L水，然後加入薑片~ 
待滾起時，加入所有材料~ 
然後用大火加蓋煲約15分鐘~ 
再轉慢火加蓋煲多1個半小時~ 
最後加入少少鹽調味，就可以飲啦~ 
雖然材料簡單，不過啖湯清甜得嚟又好潤，所以都幾好好飲呀！
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，睇下呢個湯水啱唔啱自己呀！
更多小小豬的湯水:
作者：小小豬的成長日誌