【曾智華】靠苦幹不靠父幹
2017-07-26
最近,凡到中產老友飯局,多會被問一條無聊問題,我聽了頗不以為然,唔多順耳,正是:「喂喂,阿碌,你買咗新樓畀你仔女未呀?」
吓?乜幾時開始,做父母要有責任買樓畀仔女?兼且,仲要新樓?擺明中咗「地產麻醉劑」。
呢種麻醉劑,不單止地產發展商、地產代理有分製造,電視、報章等傳媒,亦有分攜手「做大佢」,搞到變成一種似乎是理所當然的文化。因為,凡見到新樓買家排隊,記者 就專挑選笑口噬噬話買樓畀仔的客人報道,仲要加句:「嘩,再唔買,容乜易又升呀,遲入市咪會執輸?」
執輸?哈哈哈,你二○○九年至二○一二年入市,就真的利用盡低息形勢嘞。去到二○一七年,二手樓市場已經死死吓,新樓只因發展商自己做次按,才可變九成按揭,即政府認為高樓價大風險,禁止銀行助長升勢,不准高樓按的時候,商人為做生意,加上屬自己貨品,則有另一盤算。做父母,此時此刻樓價高成咁,風頭火勢才話為個仔而撲入市,幫佢畀首期。唉……大家再善忘,都應該知道乜叫負資產啩?若又來一次,到時呢群「慈父」「慈母」係咪又要攬上身,幫仔女贖身?究竟,佢哋有冇聽過《愛你變成害你》此歌?
小弟素來覺得,作為父母,將仔女養大成才,供書教學,已完成責任。再用有形無形之手去幫佢,等於妨礙佢成為一個真正獨立的人。父母條「臍帶」,生理的,一出生就要剪。經濟的,當仔女出來社會工作,也要狠狠剪掉,讓佢哋平等參與向上游挑戰。全部應該靠苦幹成功,而不是靠父幹!靠苦幹成功,人人拍掌,成就感滿滿。靠父幹,一世被人揶揄二世祖或「靠老竇」,怎能挺起胸膛抬起頭做人?咪累佢啦。
最近,見到練馬師葉楚航話:「個仔想做練馬師,由馬伕做起,成功不靠父幹!」正呀!
作者: 曾智華
星島日報授權轉載