【Kelly】香港總商會免費請市民搭電車同小輪
2017-08-24
香港總商會嚟緊十一月二十九日,將會再次舉辦「全程為您」活動,當日請全港市民免費搭電車同天星小輪呀!
總商會同Kelly講,今年「全程為您」活動別具意義,因為除咗係香港回歸二十周年,亦係總商會創會一百五十六周年,而電車同渡輪都係本港歷史最悠久、最具代表性嘅交通工具,見證住香港的成長,所以佢哋決定今年再次請市民乘坐電車同渡輪咁話!
大家可以喺當日免費乘坐來往堅尼地城同筲箕灣嘅全線電車,同埋來往尖沙咀至中環及灣仔嘅兩條天星小輪航線。呢個活動已經喺第七年舉辦,香港總商會總裁袁莎莉話,喺過去幾年,活動都大受歡迎,受惠嘅市民同遊客總共超過一百五十萬人㗎!
作者: Kelly
頭條日報授權轉載