百厭Bailey同Ethen由細玩到大，兩人感情好好。

改編自同名暢銷小說的電影由拍攝《秋田犬八千》的金像提名導演Lasse Hallstrom執導，講述一隻狗狗死後再投胎輪迴轉世四次的經歷，及從得意到癲的狗狗視角看世界，「甚麼是生命的意義？活着是為了甚麼？」電影暖意窩心，全程又喊又笑梅花間竹，貢獻了三張紙巾，五星治瘉。（剛上映）

男主角狗狗嘅第一世係一隻流浪狗，生命好短暫，之後佢好快就投胎成為金毛尋回犬Bailey，因為曾經歷眼前一黑，Bailey一出世就好多問題，究竟生存為咗乜嘢？同小男主人Ethen（Bryce Gheisar飾）相處得好快樂，陪着他升大學，再經歷分離，眼中只有主人嘅Bailey好唔明白，「人類總係做一啲狗狗唔理解嘅事，例如離開。」

狗狗眼睇得通透

唔使飲孟婆湯嘅Bailey帶住記憶輪迴轉世，先後做過警犬Ellie、Cute爆哥基Tino同牧羊犬及聖斑納混種嘅Buddy，每一次重生都令Bailey變得成熟。做咗幾世狗，忠心Bailey終於明白，生命係乜嘢，就係最重要開心，唔好經常為過去嘅事而憂傷，對未來亦唔好成日愁眉苦臉，活在當下就係狗嘅使命。其實做人都一樣。

觀後感︰Bailey轉世投胎只為遇見舊主人，然後我很掛念在彩虹橋上的寶貝貓貓，眼淚完全失控，養緊或養過寵物的朋友要多帶一包紙巾入場。

重要波波

Bailey同Ethen經常玩一個扁平嘅波波，此波是一個重要信物。

跟埋拍拖

Ethen大個開始拍拖都會帶埋Bailey，此段戲又甜又好笑，Bailey眼中嘅Kiss概念好有趣。

英勇警犬

警犬Ellie係女仔，Bailey初初好唔慣，之後佢慢慢學習，仲好快成為救人無數嘅英勇警犬。

短腿Tino

呢段狗狗歷程好完整，Tino見證女主人由拍拖結婚到生小朋友，但Bailey心中最牽掛的始終不變。

終於相遇

 50年後，輪迴三次嘅Bailey終於同Ethen相遇，諗起我又開始眼濕濕。

醒目Bailey

由Buddy憑記憶同氣味奔回Ethen舊屋已經忍唔住，為令Ethen相信自己係Bailey，醒目Buddy諗起呢個波波。

撰文︰廖思慧

頭條日報授權轉載