【田媽玩樂誌】豬隊友

媽媽谷或討論區都會經常見到「豬隊友」呢個稱呼，泛指一眾食嘢唔做嘢、做嘢打爛嘢、俾個仔女佢湊會唔見咁忽的豬老公/豬爸爸，你同我身邊總有一個喺左近。

每次出現呢個topic，都會有無數回應，大家都忙於分享身邊個豬隊友做咗乜嘢「好事」。

問心，田爸都曾經係一個豬隊友：P，但係田媽某年某月某日改變咗自己的心態，我個豬隊友慢慢變咗我個好隊友、甚至係神隊友。

記得Justin剛出世的時候，田媽係一個超級緊張大師。可能因為要餵人奶、夜奶、又係新手媽媽，好多事情田媽都會好執著，要衆人跟住我的方法去做。而田爸係一個比較creative既人，佢覺得件事做到咪得囉，你理鬼我點整！

田媽嘅日哦夜哦攻勢、再加上每次田爸唔跟我方法我就會嬲豬，大家關係變得好緊張。而且田爸亦都唔太想去湊仔，因為湊親都俾我話，親子關係亦變差。

咁落去都唔係辦法，田媽有一日就試下新方法，就係叫得田爸幫手，就放手俾佢做，無論會搞出乜嘢大頭佛古怪嘢，都唔好出聲！

經過一段時間的訓練（哈哈！），田爸而家每逢放假都會幫Justin洗白白、會同佢bedtime story。有時候田媽出去做下自己嘢，佢哋兩個不知幾happy，因為可以盡情地玩無聊野。基本上田媽係好放心俾田爸湊仔。

小朋友就係咁，除咗同佢玩，亦都要負起部分照顧佢的責任，落手落腳去湊，先會建立到好穩固的親子關係。如果有田爸喺度，田媽係透明的！

爸爸做得多咗，就自然上手咗，咁湊仔做家務都冇難度，亦都可以幫輕田媽好多。

原來，就係隻眼開隻眼閉，令我的豬隊友變做我的好隊友。慢慢長路，你的豬隊友要同你並肩作戰好多年，與其成日投訴佢，不如放手俾佢試啦，小朋友無穿無爛就算啦。而且，爸爸總係有意想不到的湊仔方法，會令你有開心的意外驚喜！

 如果你喜歡田媽今次的分享，不妨留意埋我哋的專頁，接收更多親子玩樂同育兒資訊： 《田媽玩樂誌》

作者：田媽玩樂誌