【柯豬媽媽】兒女病比自己病更難受 (另有兒童補充劑小分享)
2017-11-09
自9月開學起柯豬家姐就病倒，感冒咳嗽時好時壞，啲菌仲傳染給些莉妹同埋我自己，我哋3個人加埋睇咗不下6、7次醫生，見過3個不同的醫生，西藥、中藥、dietary supplement、煲湯燉品，咩方法都出齊，最後到咗11月情況終於有起色，thank God~!
哩兩個月與病菌的搏鬥真係好辛苦，最慘係睇見兩個小朋友輪住病，家姐嘅面珠墩同肚腩仔都唔見晒，得番層皮。些莉妹由原本有笑容嘅baby變到唔多笑，有時見到我仲大喊，可能以為我又要迫佢飲藥水。做阿媽嘅唔使講，一定係無覺瞓，日夜照顧兩個病童，黑眼圈加深，毛孔粗大，最激氣係又唔見啲脂肪減少！
而家即使柯豬已經痊癒，佢返學我都會要佢戴口罩，希望唔好咁易又中招，真係唔想經歷多次，雖然我諗一定唔止一次。。。(哭)
不過都有啲開心事，就係柯豬嘅分離焦慮似乎已經過去，由上星期開始準備返學和出門都沒有哭鬧，好乖咁同我講「媽咪byebye， 我放學返嚟揾你呀！」 阿媽放心晒 ☺
講開supplement， 其實都唔知係咪真係有效用，但不妨同大家分享吓我買俾柯豬嘅補充劑，大部分目的都係增加身體抵抗力。
左：Black Elderberry Syrup 接骨木漿果糖漿
有一個星期柯豬感冒情況比較輕，我就嘗試俾呢款糖漿佢飲，每次5ml， 一日4次。食咗大約一個星期，可能因為始終感冒菌未清，仍然有流鼻水同咳，唯一神奇嘅地方令柯豬由無胃口食嘢變成有胃口，每日都主動同我講想食嘢 (以往好少問我攞嘢食，除了零食)。
中：Echinacea liquid formula 紫錐花液體配方
暫時只飲用過2次，未知效果，每次滴10滴入口，一日4次。
右：Chewable Probiotic tablets 益生箘咀嚼片
益生菌算係眾所周知對腸道健康有正面幫助嘅補充品，雖然平時都有食吓Yogurt， 但藥片勝在方便收藏，每日1粒，柯豬好樂意食，更會提醒我俾佢食呢個藥。
另外仲有款兒童用嘅cough + mucus syrup for nighttime，有一晚柯豬瞓到零晨2點突然咳嗽，係咁咳令佢瞓唔番，好憫憎。我抱佢起身俾佢飲咗一茶匙呢款藥水，可以緩和咳嗽同令佢瞓得好啲。柯豬媽覺得效果不錯，但佢主要成分係黑蜜糖，只建議2歲以上兒童飲用。
柯豬媽揀補充品主要睇成分，選擇不加糖份和酒精的，因為同樣係兒童補充劑，有啲product會有酒精或者額外添加糖，所以家長真係要花時間睇下成份表。另外就係用家review， 因為柯豬媽之前未買過，所以要閱讀其他用家意見再下決定購買與否。
作者：柯豬媽媽