【芊嶠與細佬·雞蛋仔】影相真係回憶嗎？回憶唔係應該記在心中嗎？
2019-06-11
呢個年代，部部手提都有影相功能，出街前幫仔女打扮得靚靚，出到街，係咁叫佢哋，企定定，著得咁靚我幫你影張相先！陣間 upload 上 Facebook 俾啲朋友仔睇下先！
其實我都有犯呢個錯誤，著得靚就要幫佢影相？影相比人睇真係重要嗎？但可能喺影嘅過程中，佢係唔願意/唔合作！
好啦！今日媽媽帶你去觀塘一間新開 PlayHouse 玩啦！去到，喂喂喂！你企係波波池入面，拎住個波波，俾我影相啦！記住唔好郁呀！
好好笑！乜唔係帶佢去玩咩？點解要企定定喺波波池影相呢？要紀念丫嘛！
今日第一日返學，媽媽一早幫你著住整齊嘅校服，就早啲出門口啦！去到門口，你企定定比媽媽影返張相先！正經啲啦！影低第時俾你睇返㗎！