【曾智華】聖若瑟書院的日子
2020-01-23
近日，母校聖若瑟書院突然曝光率大增，主因是這所一八七五年創校的現存最古老羅馬天主教男校，公布耗資五億元，花二十二年時間全面翻新校舍。
書院現今校園，北座一九二○年建成，西座於一九二五年啟用，早在二○○○年已被列為法定古迹，即不准改建，要「郁」，就只可「郁」東西兩邊的建築物。未來日子，堅尼地道七號附近，肯定沙塵滾滾，附近街坊要有心理準備。
小弟一九六五年至一九七二年在聖若瑟就讀，共七年，當然留下不少回憶，但是日子並不過得怎樣愉快。因母校用全英文上課，水平亦相當高，搞到我呢位由中文小學（寶血學校）轉入的新丁，有大段時間根本唔知老師噏乜，自然成績低落，每班四十五人，次次考三十八至四十名，僅僅可以升班，相當冇癮。
此外，童年時因為食，變成大肥矮仔，不時被其他同學嘲笑。幸而，終立下決心，中一開始，天天返早半小時打籃球，哈，跳下跳下，竟由五呎二吋增高到五呎八吋，信心立時建立。然後為防被欺負，課餘更學習蔡李佛，正是唔打得都嚇得，冇人再敢欺負我矣。
點解提到欺負？因純男校，根本就是一個微型社會，自然「弱肉強食」（有似如今美國欺負伊拉克），身材瘦削、肥胖、矮、乸型及漏口者，一律屬被欺負對象。
當然，大件事發生，老師會介入處理，但學生日常在操場及課室時間咁鬼長，當然要適應「森林定律」，知道如何保護自己（例如埋堆及習武）。
聖若瑟書院校風非常開放，所以，乜嘢類型人物都有出過。近日報道的，當然只提著名校友，例如「光纖之父」高錕教授等等。
對，聖若瑟出過N咁多高官、大狀、醫生、學者、科學家、馬會主席、議員……
但同時，亦有個別作奸犯科要坐監。更嚴重，連環殺手也出過，這方面，也是一個社會的縮影。
這所名校，在未來日子，肯定仍會在香港教育界舉足輕重。
作者: 曾智華
星島日報授權轉載
其他文章：