【Kylife】媽咪二次懷孕13W︳第一次及第二次健康院產檢及到公立醫院做唐氏前期篩選!
2020-03-27
今次主要分享我兩胎的政府產檢體驗,同埋我的懷孕經驗分享俾各位孕媽咪!
我第一胎好好彩被助產士揀中可以喺威院做產檢,所以由第一次登記到生BB都唔洗去健康院做檢查,不過今次無依個機會啦, 所以我都要同各位孕媽咪一樣健康院做產檢。
今次第二胎,由經期計算的預產期同超聲波結果偏差咗一星期,所以我想有再準確的預產期先去預約健康院。預產期小知識:唔少孕媽咪的預產期會隨著胎兒長大,照超聲波時發現開始出現偏差,無論係提前或延後。之前我都問過助產士,如果預產期差異有一星期以上,就記得要通知分娩的醫院或者健康院,因為入院紙有機會有改期!
相信去健康院產檢大家都會聯想一件事「 等好耐都未走得!!」我第一次預約是早上9點15分,不過我知道大概半小時前已可登記,所以我都提前咗。
第一次健康院產檢,登記後就馬上驗尿,磅重同量血壓,好快我已經見姑娘做初步諮詢,之後就再等醫生檢查同聽BB心跳,最後驗血都好快搞掂,只是無諗到等姑娘俾預約紙等咗一個鐘有多,再加上最後等拎孕婦維他命等咗半小時有多,最後要去到12點半先走得!