【大仁】仲平仲好食 IG彩虹千層蛋糕
2016-03-03
我想食千層蛋糕,不過 Lady M 又貴,款又老套。原來市面有「彩虹千層」揀,超吸引的蛋糕,由IG Emily 幫我造。
第一次在 IG 訂食物,感覺玩 FB 真的有點老餅喎。蛋糕達人Emily:「你想要咩味呢?Rainbow就唔建議揀深色味道,(我:哎呀!阿囝鍾意朱古力喎),抹茶鍾唔鍾意?」
我早了 7 日前預訂,因為 Emily 的訂單非常爆。她說:「你交收嘅同一日,就有 7 個ORDER」,(嘩!一對手一日點做 7 個蛋糕呀?)
自從 SY 知道我訂了布甸狗千層給他,小朋友日日問著:「幾時可以食布布?我好想快D食咗佢落肚」(勁殘忍!)
我問 Emily:「你係IG賣蛋糕好耐㗎?」,蛋糕達人答:「我最初完全唔識整甜品,但好想學人整千層蛋糕,於是就上網自學,最開頭整極都好難食…」
Emily:「到終於可以入得口之後,我就每日將 D 製成品 POST上IG 自娛…點知 3 年前,有個男人 PM我,問個蛋糕賣唔賣,於是就開始我嘅賣蛋糕生涯。」
(咁你即係全職咗 3 年?) Emily:「唔係呀!我正職係跳舞㗎,所以之前都係間中賣下…如果要講正式開始不停手咁做,就係上年聖誕囉!」
我沒有想過,原來造蛋糕也要開通宵。Emily:「冇辦法,因為交收一般係下晝,所以攪好晒,夜晚先可以再開工。煎皮又要花粒幾鐘,之後逐層皮搽 cream,所以每晚 4 點幾先有得瞓。」
SY 問我:「個蛋糕真係一千層㗎?」我本來想慢慢數,但數數下,眼都矇,先醒起直接問Emily…「一定係20層皮,19層cream,你個 Rainbow 就 20 層皮 20 層cream」
用刀切開彩虹蛋糕,質感比想像中更輕盈,原來 20 層的蛋皮也可以有如此輕鬆的刀感,好正喎!!
彩虹配綠色的抺茶…原來一點也不違和,SY:「爸爸…點解唔買朱古力呀!…E~原來係綠茶味嚟㗎…好食呀!布甸狗D黃色仲好食」
最初,以為手作蛋糕一定「巖巖巉巉」,其實這個彩虹超工整,難以想像只是一個人,屋企自家製。
20 層的忌廉,滑到似 NewBornBB,愈食愈上癮,SY 更要求:「可唔可以再添 2 嚿呀 ?」(你第一嚿都未食完呀!老友。)
真心覺得超值,有人花 5 小時完成的蛋糕,4 吋分量只是$195。蛋糕又香又滿足,可能幻彩顏色關係,我覺得與 Lady M 比較,今晚食得更開心,更興奮喎!
外觀:★★★★★
味道:★★★★☆
價錢:★★★★☆
Ig:xlxlxlxl
FB:Xlxlxlxl北海道牛乳千層蛋糕
文:大仁生活