【血庫告急】胎盤前置生產或大量出血有生命危險 待產準媽媽呼籲大家捐血救人

有捐血者及香港紅十字會職員捐血後確診新型冠狀病毒，引致憂慮，加上疫情嚴重，市民減少外出，捐血人士大減，血庫嚴重告急！有準媽媽在網上發帖，表示自己患有嚴重胎盤前置，有機會令生產時大量岀血而引致生命危險，因此她於網上作出呼籲，希望大家和身邊的朋友捐血。

這位準媽媽7月31日在網上發帖，以「求助：可以麻煩大家同埋身邊的朋友如果可以的話去捐個血嗎？」為題，表示自己懷孕35週6日，醫生診斷為嚴重胎盤前置，所以要提早入院觀察，等待開刀。「胎盤前置暫時唔喺度詳解了，總之重點就係一個令到生產時有機會大量岀血而引致生命有危險嘅情況。」

她引述醫生的意見，表示若不幸岀現大量流血的情況，首要對應就是輸血，但由於近日血庫存量非常緊張，可能真會得番幾包，但好多時候需要嘅血量不是幾包，而是幾十包。「如果到時侯無血可以供應到，唯一嘅方法係收集番自己流岀嚟嘅血，過濾之後再輸番俾自己。但由於孕婦嘅血會混入咗胎水，所以輸番俾自己嘅時侯有機會引致嚴重過敏反應，亦都會有生命危險。」若到時不能用自己的血，而血庫又不能及時供應的話，有機會引致心臟問題，中風，甚至死亡。醫生更直言：「到時如果無嘅就真係無辦法」，令她非常擔心。

她表示即使不是胎盤前置，正常生產的話都有機會需要輸血，所以有需要的人很多。她呼籲大家：「雖然未必幫到好多，但如果可以的話，可以麻煩大家去捐個血嗎？」

早前，香港紅十字會在FB專頁東區醫院婦產科副顧問醫生李灝賢（Dr Diana）的訪問內表示，血對產科非常重要，媽媽在生產期間會流失大量血液，「我做過輸血最多嘅case，個媽媽喺生產過程中總共流咗 11,000cc 血，真係一邊流一邊輸，媽媽全身嘅血都已經唔係佢自己嘅。」她又表示平均每年都會遇到3、4位孕婦，需要輸10 包以上的血，她呼籲大家可以透過捐血，成為救人團隊的一份子。

📍捐血站地址、電話及開放時間
（歡迎致電捐血站預約即日及翌日時段）
https://www5.ha.org.hk/rcbts/loc-all

🚍捐血車、流動隊動向
https://www5.ha.org.hk/rcbts/mobile-schedule