媽媽分享 ︳奶奶妒忌孫仔黐實媽咪 話要日日嚟霸住個孫 直至孫仔肯黐佢為止

^圖片來源：TVB《BB來了》劇照

一位媽媽分享：

奶奶妒忌我與BB關係好，竟然對我說日日要霸住個孫，直到孫仔鐘意佢、肯黐佢為止。

事實上，奶奶發神經的問題，由我大肚開始。

我不知道其他人怎麼樣，但是我除了老公以外，不喜歡與人有親密的身體接觸。但是當奶奶知道我有了BB的時候，她的奇怪行為令我感到十分不自在，例如經常要摸我的肚皮（不是隔衫，而是直接摸到肚皮），說要與胎兒交流。數次之後我忍不住開口叫「唔好」，她竟然訕笑說：「我知道我唔應該咁樣，但是肚面的是我個孫仔喎。」

自從兒子出世後，奶奶的佔有慾越來越強，經常抱住BB唔肯放手（大姐，BB要食奶㗎），暗示明示都好像聽不到，激死！現在發現屋細有屋細的好處，就係奶奶無得留低過夜，不過佢都每個星期有兩三日要上來湊孫。

BB到了4個月大，肚仔餓、想瞓覺時會發脾氣哭鬧，這是十分正常的事情。但是奶奶遇上B仔發脾氣大喊時，便以為孫仔唔鐘意佢。不過最爽的是只要BB一過我手，「衰仔」十次有九次都即刻收聲（哈哈哈），因此令到奶奶非常無癮，甚至妒忌，日日表演女子單打（單打有奧運奶奶一定攞冠軍），說話刻薄難聽，因此佢一出現，我逃入洗手間的機會大增，真係避得幾耐得幾耐（真係想學果班官千夫所指仍面不改容，不過自問仲有少少羞恥之心）。

有一日，奶奶見我引得BB大笑，突然勃然大怒，竟然對我說BB成日黐實我，從今日起，要日日霸住個孫，直到孫仔鐘意佢、肯黐佢為止。我當時不懂反應，只是嗯嗯後便不再回話，老公回來又扮老懵懂，聽唔到睇唔到，仲戴口罩飲茶！

果然，奶奶真的日日上來霸住個孫。大姐呀，肺炎呀，唔好四圍走啦，老公又唔肯封關，繼續畀奶奶上嚟，話消毒吓就得，激鬼死人，終有一日我帶埋個仔搬返娘家！

不過奸有奸輸，奶奶又唔識得同BB玩（佢好似無湊過我老公，識生唔識湊果種），又唔識得抱BB瞓，結果「衰仔」好似越來越唔鐘意佢，只要BB一到佢手中，就會自動大喊，最後又係要比返我湊。

世事有時就是如此，你以為強權壓迫就會得逞？有報應㗎（孫仔一見佢好似見鬼），真係要開香檳慶祝！