【多多包容】女兒患有ADHD及自閉症 港媽發文望勿隨意公審多體諒：佢哋可能係特殊需要孩子

我們要對特殊需要兒童有更多包容和體諒。

近日，一名育有特殊需要孩子的港媽，在社交平台投稿發文，以自身經歷希望社會大眾能對他們有多一份理解，多一份包容：「如果有一日喺街上，大家遇到有啲好曳、唔聽話、情緒失控嘅小朋友，可唔可以包容同體諒一下，唔好拍片擺上網公審，唔好一句『唔識教唔好生』嚟發洩你嘅不滿？」

港媽表示女兒是ADHD和自閉症譜的患者，雖然病情屬於輕度，但都會比較難以自我控制。譬如行為上要重複又重複，做功課又會非常心散，上牀之後可以獨自唱歌不願睡覺等等。

「總之，當佢手上有咩，都係可以攞嚟玩。用溫柔聲線，佢唔會聽，每一次都係要用到最大聲、最惡嘅語氣同聲線，佢先會發住脾氣去做。」

港媽坦言，平時照顧女兒都己經感到身心疲勞：「（如果）情況比較嚴重嘅小朋友，其父母身心應該比我更累。」

港媽曾試過閱讀、找資料尋找育兒方法，但都徒勞無功。她指，自己曾遇上不少教她如何教女的人，「你唔識教啫」、「你縱佢啫」、「教到佢咁曳」、「咪點點點教囉，點會唔得啫」、「點解人哋得，你唔得」之類的說話早已聽過無數次。雖然如此，有時聽到這些說話時，她依然會感到自己「好無用」。

「當時我覺得自己好無用，唔識教好自己個女。又唔知係唔係我懷孕時，唔知食咗啲咩，又或者無好好餵母乳，佢先會有呢個病。事實上，當我收到評估結果時，我係接受唔到，但同時又得到一個安慰，因為呢個病係先天，無任何原因，亦唔關管教問題嘅事。」

港媽表示，特殊需要的小朋友其實明白自己的行為不妥當，但只是因為他們無法自控，而非他們頑皮，亦非家長不懂得教或者無用。「當然我唔可以用呢個病作為藉口，放任佢唔管教啦。」

因此她希望借助自己的經歷，和一段簡單的文字，去讓大家和社會大眾更加了解特殊需要兒童。

「我聽到好多聲音，睇到好多嘅投稿，都會話：『唔識教唔好生。』其實大家有無諗過，我哋比一般父母更勞心勞力，更用心去照顧小朋友？有邊個唔想自己小朋友無病無痛、健健康康、正正常常、聽教聽話？你哋知唔知呢句說話，係抹煞晒所有父母，特別係我呢類情況嘅父母嘅努力？有時唔係我哋唔識教、唔想教……」

因此她希望，如果有天大家在街上遇到一些很頑皮、不聽話、情緒失控的小朋友，能夠更加包容和體諒，不要動輒就拍片放上網公審、不要拋一句「唔識教唔好生」去隨便發洩不滿，皆因他們都很有可能是ADHD或者自閉症譜系的小朋友。

「我相信，同我有同樣情況嘅父母，對各位受困擾嘅人士都感到抱歉，但能夠得到大家嘅體諒，係對我哋最大嘅鼓勵。我亦想鼓勵有同樣經歷嘅父母：『辛苦你哋喇，你哋嘅努力同用心嘅照顧，小朋友係感受到，所以唔好氣餒，大家一齊加油！』」

新聞來源：生仔要考牌系列 @Facebook