【湯水食譜】健脾潤燥 蓮藕眉豆紅蘿蔔豬骨湯 | 小小豬Kinsey

喺街市買餸時被菜檔姨姨極力推介我買蓮藕，見啲蓮藕都肥嘟嘟又夠重身，所以買番節嚟煲啖靚湯啦！

蓮藕同眉豆都係啲滋補潤燥嘅食材，好適合依家嘅天氣飲用，所以我就煲依個蓮藕眉豆紅蘿蔔豬骨湯啦~

蓮藕兩節(約一斤)、紅蘿蔔一條、眉豆一兩、紅棗八粒、 紅腰豆 一兩、豬骨約$45及薑三片~

紅棗洗乾淨後去核~

然後連同眉豆及紅腰豆浸洗一陣~

蓮藕去皮切塊~

紅蘿蔔去皮切塊~

豬骨汆水備用~

煲內放約3L水，然後隨水加入薑片~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

記得唔好漏咗啲湯料，有蓮藕又有豬骨，又可以做一個餸啦~

以下係各食材嘅功效，可以參考一下呀(網上資料)：

蓮藕 – 健脾生肌、化痰止瀉、養胃滋陰。
紅蘿蔔 – 有助健脾消食，同埋化痰解毒。
眉豆 – 含維生素B1能維持正常的消化腺分泌和胃腸道蠕動的功能，抑制膽堿酶活性，可幫助消化，增進食慾。
紅棗 – 均補心脾及益氣安神。
紅腰豆 – 有補血、增強免疫力、幫助細胞修補及防衰老等功效。
薑 – 抗發炎、祛寒強免疫。

溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！

作者：小小豬Kinsey

其他閱讀：

【飲品食譜】紫蘿蔔蘋果汁 | 小小豬 Kinsey

【飲品食譜】清肝熱又潤肺 雪梨乾椰片菊花茶 | 小小豬 Kinsey