手動轉胎+生產記@│Yennie Darkins

2021-09-22


小妹於20/9出世啦!

以為第四胎,自己知道一切嘅時候…

其實每一次懷孕都唔同,都有學習嘅地方。

呢個妹妹因為36週仍未掉頭,上星期四(37週)我入咗院做手動調頭(ECV)

天真以為5分鐘攪掂走得,但原來事前要做好多檢查,事後要留院一晚。

前一日要交檢測報告(我喺星期三交咗口水)。

當日7點禁食,8點半入院時,要磅重、量血壓、照超聲波睇BB位置同大細(約2.3kg)、臥牀測BB心跳、陣痛同胎動。

ED3E9F2A-07B9-4707-B5E2-01534CD68A6F

十點半左右打豆。護士幫我打左手,佢又抽又插又抽又插…結果插爆咗條血管(我知佢唔想,我無怪佢),但跟住打右手時,我就開始暈…眼前一黑,有啲耳鳴,講野都無力…

呢幅係五日後影嘅⋯被插爆血管後嘅瘀況

5F760AA1-39C1-4154-8888-0A739013306F

我瞓番喺牀到休息咗陣就無事。

一點上產房時,有成十個人喺房準備ECV, 個陣容我係嚇親㗎🙈佢哋再檢查亞女位置(超聲波)、心跳等,知道臍帶唔喺下面,就喺我肚到落gel ,由兩個醫生負責轉。一個捉住個頭,另一個剷起咗對腳,然後順時針轉…過程中,護士不段提我,痛的話可以吸笑氣,但真係唔痛,我無吸過~好快就搞掂咗!可能我個肚大、亞女細,所以轉時唔痛啦!

佢哋用超聲波確認bb轉咗落嚟、無宅住臍帶、bb心跳正常先離開。我就自己喺產房呆等(被觀察)兩個鐘

ABFBFCF9-0B72-4143-B6F8-87F1CCEFE20A

檢查bb心跳、陣痛同胎動,正常先轉返去產前病房。

結果梗係正常~跟住我去返產前房,期間要檢查我血壓、bb心跳、陣痛同胎動兩至三次,每次半個鐘

第二日都正常先走得。

就喺呢一晚開始,我就有陣痛,每5分鐘一次,有成個幾鐘都係咁🙈我以為自己生得

助產士話,通常做完ECV,bb都要啲時間入盤,唔會咁快生。

我翌日出咗院。接下嚟嘅兩日,我斷斷續續咁有每5分鐘一次嘅陣痛。但我無入院,因為我知我入的話,有排等,又無老公陪。

你望下啲陣痛密到個app係咁叫我去醫院~

EEDDE4BA-85FF-4B30-BF48-74F7B002B44B

直到

星期日凌晨2點,我感到有啲啫喱狀嘅嘢流咗出嚟,但我都照瞓。有陣痛都瞓(有時會痛醒)。到6點時去廁所…發覺都幾多液體流出,原來穿咗水🙈跟手見埋紅。

我前三次都係陣痛入院,要人工穿水,我都係第一次咁穿法~

我去整醒我老公,佢個樣好好笑😂

彈起身話:「去醫院啦!」

7點去到醫院產房,檢查晒基本野後,我又去返產前護理房待產。

老公打咗兩針疫苗,但未夠14日,佢之前都有隔三日去做檢測,但因為星期六我痛到以為自己會入院,但又住入,佢就無去做檢測🙈咁我入院時佢就陪唔到產。佢即刻走咗去私家到做檢測,等三個鐘有結果先入得產房。我知佢未入得,但醫生已經推咗我入產房催生…我就叫佢哋唔好落唔多藥🙈我要等埋我老公。產房唔開後手提電話,每次搵老公都要借電話打。

佢知自己唔入得產房住,又知道要等…我打俾佢時佢竟然去咗返工😑唔知好嬲定好笑😂

到佢入到嚟產房,都差唔多三、四點。

嗰刻佢捉住我隻手❤️捉咗一陣後,就坐到老遠、最舒服嗰張椅瞓覺😂都知佢瞓唔夠㗎啦~由佢瞓啦!

落完催生藥,陣痛愈嚟愈密同痛,我一路都有吸gas and air。一點半左右仲打埋止痛針。其實生影曦靖翹時我都有打無痛,生舒韻時因年初二無咩人返工,打唔切。今次我由入產房一劇(十點半)開始問,佢哋講咗好多風險嘢,我話明白,我都堅持要打。佢哋話要睇返陣痛情況同宫頸開咗未先得…仲要睇下麻醉師得唔得閒過嚟…如是者,我每隔一段時間就問,終於喺夜晚8點時,喺宮頸一度都未開嘅情況下幫我打咗無痛(喺背脊脊椎插支針入去做半身麻醉)。我明白麻醉師手勢次次都唔同。而今次…佢係完美完成半身x半身麻醉,即係我下半身嘅左邊唔痛,但右邊仍然痛。唔知大家知唔知,每生一個B,陣痛係會愈痛嘅🙈所以今次即係只有下半邊痛,都仍然好痛!

打咗無痛後,陣痛係疏咗。直到十一點左右,宮頸先開始開。我同老公仲係到諗,究竟BB會係19號定20號出世呢? 

(其間,老公仲話,想我快啲生…因為佢怕無車返屋企😑佢好肚餓,又好眼瞓💤好想打佢😂不過我一向都知佢係咁~如果佢話:想你快啲生,唔想見到你咁辛苦…你話會浪漫幾多呢?)

結果係,過咗12點,我開始感覺到有想推嘅感覺。我等多幾下先按掣叫人入嚟,佢地已經話,BB頭仔雖然未落晒嚟,但你可試下push.

每一下陣,我吸到三啖氣左右咁推,推咗五次,15分鐘左右,亞女就出咗嚟~ (生影曦時push 咗三下,6分鐘出咗嚟)

0E036ACB-06EB-43EB-B66D-A41E59C7E4F6

 

亞女得2.38kg, 5磅多少少。不過健康就夠啦!

老公喺我push 嘅時候好冷靜咁企咗喺房嘅角落,一個我見唔到佢嘅地方😂一向怕血嘅佢,佢在場又無暈,我已經覺得佢做到好好。

我哋喺產房留多咗一個鐘左右。試埋埋身餵人奶我先被推落產後房。

6A6107CD-9317-4ED1-B52B-5FED8CBDC1DC

*講住咁多先,遲啲再續~

作者:Yennie Darkins

相關文章:

影全家福+孕照│Yennie Darkins

懷孕│公佈~我懷孕了~│Yennie Darkins

 

熱門文章

腦部發展│玩布偶有助訓練小朋友記憶力、語言力、觀察力及專注力
10-19
擁抱孩子|擁抱的力量比你想像中大 多擁抱有助孩子正向發展
10-20
孕婦湯水 |中醫師推薦 安胎湯水 (附 孕婦禁忌食物 一覽)
10-11
嬰兒健康|為BB 剃光頭 頭髮真的會愈生愈濃密嗎?
08-16
產檢時間表 、產檢流程及檢查項目 (公立醫院 vs 私家醫院)
04-06

擁抱孩子|擁抱的力量比你想像中大 多擁抱有助孩子正向發展
2021-10-20
【媽媽分享】唔好以為產假真係去放假 有得休息充電果啲先可以叫假期
2021-10-16
媽媽分享|媽媽要先把自己照顧好,才能照顧好孩子
2021-10-15
育兒心得|專家教路如何跟初生嬰兒溝通 BB話助語言發展
2021-09-20
慶祝中秋節 寶寶睡眠貼士│Charlotte Ma
2021-09-17
育兒趣聞|12個讓家長哭笑不得的童言童語
2021-09-15
查看更多   ▸