星空下的仁醫丨鍾嘉欣演繹痛失愛兒傷痛真情爆喊惹哭網民

2021-11-16

^ 鍾嘉欣奪視后呼聲高。

TVB台慶劇《星空下的仁醫》昨晚（15日）絕對是最洋葱一集，感染了「第五病」的Eman（鍾嘉欣），因胎兒Heman最終保不住流產，兩度爆喊，令人看到好心酸。劇情講述Eman與胎兒互動之際，突然肚痛，Eman第一時間被送進手術室，但Heman離開母體後已沒有呼吸；縱然焚爺（鄭嘉穎飾）盡力搶救，仍返魂乏術，最終焚爺落下如豆大的男兒淚，並甚為心痛地說了一句：「對唔住，叔叔救唔到你」。

^Eman原本好有母愛咁同肚入面嘅Heman互動緊。

Eman醒來後見不到兒子，即無助地望向眾人，最終焚爺告知其兒子已離世；得悉殘酷現實的Eman先是一臉悲慟，又帶點難以置信。之後看到兒子遺體時，才逐漸變得激動兼不斷自責謂：「對唔住呀！媽媽害死你呀！」焚爺不想痛失愛兒的Eman再承受自責之苦，攬上身指是自己失誤害死Heman，Eman聽畢即時淚如泉湧。之後Eman再與焚爺真情對話，承認自己有幻覺，並傷心地表示知道是時候放下兒子：「我唔想自己咁清醒，佢之前仲喺我個肚入面，我連同佢Say聲Sorry都冇機會。我好掛住佢，好掛住BB呀！」單是兩場喊戲，嘉欣已成功演繹了多種複雜情緒，難怪網民「睇到心都實晒」、「今晚喊足一晚」。

^當知道要做緊急手術時，佢好驚。

^佢醒番之後，一臉迷茫。

對於網民一致好評，嘉欣越洋受訪時大表感謝，並透露入行以來每個角色，都有盡力去設計及演繹，喊戲亦會隨著角色年齡而改變。而今次兩場重要喊戲也是由心而發：「投入咗個角色，畀自己嘅身體語言同思維自然流露出嚟，再隨住劇本嘅帶領以及當日嘅狀態，盡我全力做好佢。」嘉欣又坦言做媽咪後對演喊戲有幫助：「學套劇話齋，媽咪係有一種本能，我嘅本能就係更加connect到我自己嘅內心世界同情緒，即係痛可以更痛。」

談到網民指嘉欣乃是屆視后不二之選，嘉欣再次多謝大家支持，直言是很鼓勵：「我都有成5、6年冇乜演過戲，大家都仲記得同支持我，我非常感動。我對自己演出係有信心嘅，畢竟我演咗戲十幾年，未結婚之前我都拍咗成四十部劇，有好多訓練同進步嘅機會。章以芯我係好期待去演嘅，我亦好感恩呢個角色畀咗我好多學習機會，無論演戲抑或處事，我好多謝呢個角色。」