家居安全｜Patrick Sir囝囝跌傷下巴縫6針關宛珊：等候時心亂到不停踱步

2022-03-18

TVB女藝員關宛珊與林溥來（Patrick Sir）結婚7年，囝囝洋葱頭Preemo在家跌傷，弄傷了下巴，最後要去醫院縫針。媽媽關宛珊極之心痛，在社交平台貼出多張Preemo的受傷照片，以及打上一大段文字交代事發經過。

媽媽關宛珊表示「咁耐冇岀街，估唔到一岀就係去醫院」，她指Preemo當時在木地板爬，突然跣手仆親，下巴落地，喊到收唔到聲，當時老公Patrick Sir正在上班，不在家，她只好保持冷靜自己幫兒子止血，「按住傷口止咗20分鐘左右，同時避開傷口用冰敷附近嘅位置，再消毒傷口，BB仔就冇再喊仲笑住玩添，咁就帶佢沖涼食奶」。關宛珊雖然止了血，但也不確定要不要縫針，直至Patrick Sir回來見到傷口，指傷口太大，一定要縫針，「嗰一刻當我聽到Preemo要聯針嘅時候，已經喊咗岀嚟，因為咁細個BB做手術實掙扎得犀利，醫生通常建議全身麻醉，試問邊個媽咪想咁細嘅BB接受全身麻醉？」。

Preemo在平滑的木地板撞傷

之後她帶了Preemo入房瞓覺，Patrick Sir同時尋找相關資料安撫他，有機會縫針不用全身麻醉，又找了兒科醫生，「（兒科醫生）佢即時介紹咗另一位兒童外科醫生俾我哋，醫生睇完相同片，話傷口好深一定要聯針，但係好彩係佢話試吓局部麻醉加安排幾個護士撳住BB聯針，亦都預告我哋要狠心忍痛。」

兩人連夜帶孩子到醫院縫針

到晚上約10時，Preemo入睡後，兩人帶他到私家醫院，但疫情關係，父母不能陪入急症室，「所以我哋同Preemo講『一陣入去忍住痛，啪啪兩下就岀番嚟㗎喇，唔駛驚㗎~ 』」放低兒子就離開了，「4個姑娘撳住BB仔嘅頭、手、腳，用塊布遮實BB仔個樣，喺外面我哋聽到嘅係佢前所未有嘅喊聲，係好驚多過痛嘅大喊聲，大嗌『阿媽～阿媽～』真係好心痛！但係喊喊吓冇咗聲嗰吓係仲驚！喊吓停吓，心亂到不停踱步。」，最後縫了6針，醫生和護士都表示Preemo算好乖好配合，「唔算掙扎得好勁，係唔鍾意俾人撳實佢個頭啫。」，回到家後已是深夜12:30，換完片飲了奶就睡了。

關宛珊指Preemo比想像中堅強、勇敢，自己也沒想過平滑嘅木地板撞親都要縫針，同時感謝兩位兒科醫生在最短時間內給予建議及幫助。亦建議父母最好自備快速測試劑，否則就會如她一樣要即時去附近購買，兼為BB檢測完才可以入治療室。Patrick Sir也在社交平台感謝大家關心，「洋葱頭聯完針已經好好多，傻更更應該都唔知自己受咗傷，因為冇乜痛，唔需要食止痛藥，已經充滿活力同平時一樣無時停。我哋每日都幫佢洗傷口，期望佢下星期五拆線一切順利！」。