好人好事|九巴司機行錯路 乘客沒責備更幫手指路 九巴出post感謝:係愛呀!
2022-05-17
大家平時多唔多搭巴士?如果巴士司機行錯路,你又會有咩反應?近日網上流傳一段九巴269D線行錯路的影片,片中車上乘客沒有鼓譟,仲幫手帶路,協助車長駛回正確道路,而昨日九巴亦在社交平台出post感謝乘客幫忙。
從網上影片可見,一架由沙田開往天水圍的269D行錯路,巴士本身要經屯門公路駛往大欖隧道,但巴士司機行錯路,入了深井,隨後又經汀九橋進入青衣。不過車上一眾乘客沒有責備司機,反而耐心指路,齊心協力助司機把車駛回「正軌」。
昨日(16日)九巴在Facebook專頁以「來自巴士迷的愛」為題出post,表示由瀝源開往天水圍方向的269D在屯門公路上橋時,不小心行錯路,感謝一眾巴士迷幫忙指路,「憑住佢哋強大嘅記憶力,為車長指路,成功拯救咗一班『荒失失奇兵』」。
其他文章:好人好事|搭車不夠錢 獲好心人資助 台女感激:見到狗狗的最後一面
帖文中又提到乘客全程都安靜有耐性咁坐定定,令九巴仔睇到很感動,「想喺度多謝各位熱心巴士迷嘅support,仲有咁多位乘客嘅耐心同體諒!巴士迷世一!互助萬歲」,據了解行錯路的269D最終用了接近兩個鐘駛完全程,有網民笑稱「呢程抵坐」。
來源:KMB 九巴專頁
影片來源:WF9483@youtube