名人訪問︱拍《超能使者》情緒崩潰嚇親老婆 陳展鵬坦言與單文柔多拗撬:努力學做老公要包容

2022-11-24


陳展鵬於TVB台慶劇《超能使者》中段有突破性演出,原來展鵬的幸福家庭只是假象,因為「老婆」劉佩玥唔滿足生活現狀出軌,導致家破人亡。戲外的展鵬擁有美滿婚姻,接受訪問時更大晒同今世及前世情人的「私密牀照」!不過,幸福家庭背後,一向唔多提私事的他自揭暗藏婚姻危機:「始終相見好同住難,單文柔(Phoebe)又細我10年,我哋有好多分歧。」

上周《超能》劇情,陳展鵬被揭患有妄想症,於幻覺同真實記憶之間游走難度好高,因為要瞬間轉換表情,展鵬獲讚展現「視帝級」演技,被網民封為「視帝鵬」。自6年前憑《城寨英雄》首奪視帝後,展鵬今年再有機會問鼎視帝,他坦言恨再攞獎:「希望小朋友(小豬比)見到爸爸去工作有好成績,如果攞到獎畀媽咪睇就好喇。」不過,他認為近10年,黃宗澤及袁偉豪拍咗好多好戲,兩人都有機會。

半夜三更坐客廳發呆

今次陳展鵬盡全力拍《超》劇,自爆情緒一度崩潰,令老婆擔憂:「拍戲咁耐(26年)未試過連稿都唔對就離開錄影廠,喺廠外唞咗個幾鐘先回歸,有啲逃學feel,因為當時真係好辛苦,好似有密室恐懼症咁,嗰種恐慌性去到邊緣狀態,精神情緒好得人驚。作為男人好難接受仆心仆命為照顧家人,將自己放到最低,無奈現實社會就係壓迫咁大,有邊個年青人做到自己想做嘅嘢呀?呢個劇以喜劇手法包裝,實際係反映社會現狀,基層人士最想有超能力。」

因為拍劇壓力大,展鵬難免會將情緒帶返屋企:「返到屋企我仲想靜吓,唔畀人掂得,Phoebe知道我要沉澱,但未必能理解,明明早上好開心咁出門口開工,但夜晚變到面青口唇白,半夜三更開盞暗燈獨坐客廳,哈!佢驚我睇唔開啩!」

努力學做老公要包容

結婚4年多,陳展鵬自揭同老婆經常有拗撬,他仍努力學習做人夫:「梗係會有嗌霎㗎啦,點會冇呀?始終老人家話『相見好同住難』,主要係性格唔夾,尤其Phoebe獲家人萬千寵愛在一身,而我10幾歲就出嚟做嘢,兩人年紀又相差10年,兩個世界嘅人會有好多分歧。家佢去到一個新家庭,要放低身段配合小朋友、有夫家,要安排好多嘢,生活上要配合埋我工作。」而每次爭拗,展鵬坦言都係婚姻危機,他好認真解說:「就算係意見不合、黑面都係婚姻危機,你試吓每日都有普通嗌霎會點呀?其實好大件事,加加埋埋會影響到大家情緒,其實唔好講係夫妻,人與人之間情緒唔好,一秒間可以殺人,但維繫感情可能要一年,甚至更長時間。」

陳展鵬講到夫妻相處之道,首要著手了解對方性格,要包容和忍讓:「有時都會強迫自己深呼吸,畀佢鬧兩句,買杯咖啡搞掂,因為都知道係錫你嘅人,唔通老細畀面色你睇,你會鬧佢咩!只要明白到個根喺邊度,就會夠力量去得更遠,但我唔鍾意啲嘢成日重覆發生,重蹈覆轍即係未解決,累積落嚟就會出現好多問題,夫妻間有問題,個女變成維繫動力最唔好。」至於婚姻之道,展鵬表示最簡單就係幸福,最幸福係因為滿足。

採訪:方騫平

攝影:鄧國良

星島日報授權轉載

其他閱讀:

名人訪問︱吳日言疫境生B鬆一口氣 坐月老公幫手:佢係一個神隊友

星級爸媽︱傅家俊不敵奧蘇利雲 賽後變「神奇爸爸」 藉比賽啟發女凡事盡力不言棄

熱門文章

人物專訪│不通德文仍移民歐盟國奧地利 港人「阿豬媽」:「方便旅遊,讓孩子接觸不同文化。」
03-22
私家醫院生仔收費 |2023年全港11間私家醫院分娩費用 邊間醫院最受優惠?
02-03
SEN │「原來我有 自閉症 」 透過兒子了解自己的爸爸|教育心理學家心小姐
03-24
親子理財│善用零用錢教理財(下)│Amy Wat
03-23
【外傭僱主百科】解僱姐姐 僱主4招保障自己
12-03

名人專訪|堅持培養兒子逆境自處 林芊妤Coffee:孩子情緒負面是家長責任
2023-03-16
名人專訪丨任達華放手俾18歲女兒入行 曾遇襲右手好返8成畫水墨畫自癒
2023-03-14
名人訪問|《中年好聲音》主持車婉婉:「對兒子最大的鼓勵是陪伴他練習。」
2023-03-05
名人專訪丨譚凱琪分享御夫術靠靚樣冇用 拍劇玩「裸泳」老公心痛驚冷親
2023-03-03
名人專訪丨陳豪結婚9年維繫感情全靠冇秘密 奉勸藝人勿人前人後兩個樣:會穿㗎 
2023-02-24
傷殘運動員|22歲因意外切除左腳 用11年時間復健 陳浩源感謝神奇媽媽120%支持
2023-02-10
查看更多   ▸