名人訪問︱拍《超能使者》情緒崩潰嚇親老婆 陳展鵬坦言與單文柔多拗撬:努力學做老公要包容

2022-11-24


陳展鵬於TVB台慶劇《超能使者》中段有突破性演出,原來展鵬的幸福家庭只是假象,因為「老婆」劉佩玥唔滿足生活現狀出軌,導致家破人亡。戲外的展鵬擁有美滿婚姻,接受訪問時更大晒同今世及前世情人的「私密牀照」!不過,幸福家庭背後,一向唔多提私事的他自揭暗藏婚姻危機:「始終相見好同住難,單文柔(Phoebe)又細我10年,我哋有好多分歧。」

上周《超能》劇情,陳展鵬被揭患有妄想症,於幻覺同真實記憶之間游走難度好高,因為要瞬間轉換表情,展鵬獲讚展現「視帝級」演技,被網民封為「視帝鵬」。自6年前憑《城寨英雄》首奪視帝後,展鵬今年再有機會問鼎視帝,他坦言恨再攞獎:「希望小朋友(小豬比)見到爸爸去工作有好成績,如果攞到獎畀媽咪睇就好喇。」不過,他認為近10年,黃宗澤及袁偉豪拍咗好多好戲,兩人都有機會。

半夜三更坐客廳發呆

今次陳展鵬盡全力拍《超》劇,自爆情緒一度崩潰,令老婆擔憂:「拍戲咁耐(26年)未試過連稿都唔對就離開錄影廠,喺廠外唞咗個幾鐘先回歸,有啲逃學feel,因為當時真係好辛苦,好似有密室恐懼症咁,嗰種恐慌性去到邊緣狀態,精神情緒好得人驚。作為男人好難接受仆心仆命為照顧家人,將自己放到最低,無奈現實社會就係壓迫咁大,有邊個年青人做到自己想做嘅嘢呀?呢個劇以喜劇手法包裝,實際係反映社會現狀,基層人士最想有超能力。」

因為拍劇壓力大,展鵬難免會將情緒帶返屋企:「返到屋企我仲想靜吓,唔畀人掂得,Phoebe知道我要沉澱,但未必能理解,明明早上好開心咁出門口開工,但夜晚變到面青口唇白,半夜三更開盞暗燈獨坐客廳,哈!佢驚我睇唔開啩!」

努力學做老公要包容

結婚4年多,陳展鵬自揭同老婆經常有拗撬,他仍努力學習做人夫:「梗係會有嗌霎㗎啦,點會冇呀?始終老人家話『相見好同住難』,主要係性格唔夾,尤其Phoebe獲家人萬千寵愛在一身,而我10幾歲就出嚟做嘢,兩人年紀又相差10年,兩個世界嘅人會有好多分歧。家佢去到一個新家庭,要放低身段配合小朋友、有夫家,要安排好多嘢,生活上要配合埋我工作。」而每次爭拗,展鵬坦言都係婚姻危機,他好認真解說:「就算係意見不合、黑面都係婚姻危機,你試吓每日都有普通嗌霎會點呀?其實好大件事,加加埋埋會影響到大家情緒,其實唔好講係夫妻,人與人之間情緒唔好,一秒間可以殺人,但維繫感情可能要一年,甚至更長時間。」

陳展鵬講到夫妻相處之道,首要著手了解對方性格,要包容和忍讓:「有時都會強迫自己深呼吸,畀佢鬧兩句,買杯咖啡搞掂,因為都知道係錫你嘅人,唔通老細畀面色你睇,你會鬧佢咩!只要明白到個根喺邊度,就會夠力量去得更遠,但我唔鍾意啲嘢成日重覆發生,重蹈覆轍即係未解決,累積落嚟就會出現好多問題,夫妻間有問題,個女變成維繫動力最唔好。」至於婚姻之道,展鵬表示最簡單就係幸福,最幸福係因為滿足。

採訪:方騫平

攝影:鄧國良

星島日報授權轉載

其他閱讀:

名人訪問︱吳日言疫境生B鬆一口氣 坐月老公幫手:佢係一個神隊友

星級爸媽︱傅家俊不敵奧蘇利雲 賽後變「神奇爸爸」 藉比賽啟發女凡事盡力不言棄

熱門文章

讀寫障礙|寫「鏡字」等如有讀寫障礙?|戴公主
12-16
名人專訪| 譚凱琪 :「我是愛演也會演的媽媽」 透過戲劇引導女兒學習興趣 推崇傳統學校培育好品德
02-29
名人專訪|感激老公配合工作日夜輪更照顧初生兒 余香凝 :成為媽媽是幸福的「犧牲」
12-20
SEN|言語治療師: 語言詞彙不足 影響溝通學習 協康會自家製Boardgame從遊戲中訓練
09-12
創業媽媽|辣媽CEO張慧敏進軍飲食界 與子女一同創業:希望用我的經驗,教他們做好一件事
09-24

名人專訪|三度攜女紅館演唱建立自信 關心妍 Jade:「讓孩子從經驗中學習成長」
2024-03-23
名人專訪| 譚凱琪 :「我是愛演也會演的媽媽」 透過戲劇引導女兒學習興趣 推崇傳統學校培育好品德
2024-02-29
名人專訪|長腳蟹 呂慧儀 受兒子蟹籽啟發化身Miss Lui:「傳授知識外,老師亦可陪伴孩子成長」
2024-02-14
名人專訪|不想孩子走舊路 正能量家長 江若琳 Elanne:兒子我重新 學一次「做人」
2024-02-08
名人專訪|高峰退役做全職媽媽 蜘蛛女 鄭麗莎 :「跟子女一起重新學習」 公開瘦身3大秘訣
2024-02-01
名人專訪| 楊洛婷 受原生家庭影響 將時間奉獻給子女 結婚十年婚姻如初 分享恩愛秘訣
2024-01-27
查看更多   ▸