「點解無人阻止佢自殺？」 想坐時光機去救人的他｜教育心理學家心小姐
2023-01-13
近月香港發生幾宗學生自殺個案，Theo是其中一位離世學生的校友。我看過相關新聞，所以在見Theo前已知悉情況。
Theo是位初中生，有輕微焦慮和抑鬱症狀，被轉介予我作輔導。他頭髮蓬鬆，滿臉暗瘡，一副疲憊的模樣。
點解？
Theo 癱坐在我的沙發上問：「你知唔知我學校發生咗啲事？」
我點頭：「我知呀。你識唔識嗰位學生？」
Theo回答：「唔識，不過我有同佢講過嘢。有次落雨，學校操場地下有隻蝸牛，佢叫我唔好踩到佢，之後仲好小心咁搬咗隻蝸牛去側邊。」
我心裡不禁惋惜著離世學生的善良。我接著問：「啊… 咁件事發生咗之後，你有咩諗法或者感受？」
Theo的情緒忽然激動起來，帶點生氣地說：「我唔明。點解會無人發現佢唔開心，無人幫佢？佢嘅爸爸、媽媽、老師、朋友點解會無留意到佢有困難㗎？我真係好想有時光機，等我可以返去之前幫佢！」……
困惑、憤怒、悲傷、甚至內疚 —— 這些均是危機事件發生後常見的初期情緒反應。
我嘗試聆聽和理解Theo的感受，並提醒他：「我明白你依家腦入面有好多問題，想知道之前點解無人阻止事情發生，哩段時間有哩啲諗法係正常嘅。
自殺的成因一般都好複雜，我哋好難亦唔需要估係邊個嘅責任。
好似你咁講，我哋之後可以做嘅係多留意身邊家人、朋友嘅情緒狀況，及早發現有困難嘅人，盡早支援佢哋，預防情況惡化，亦令佢哋更快康復。」
睇唔出
Theo突然打斷我問：「但係有時睇唔出一個人嘅情緒狀況，咁點算？」
他說的情況在男生之間較常見，因為他們較少與別人分享自己的情緒。
我回答：「你講得啱呀。有啲人嘅情緒徵狀比較明顯，有啲就好難睇得出，所以我哋都可以觀察一啲行為同生理徵狀。
例如學業表現突然退步、難以集中精神、身體唔舒服、皮膚狀況變差、長期覺得攰、社交上抽離等，哩啲都可能表示一個人有過大嘅壓力或情緒問題。」
Theo沈默專心的聆聽，若有所思，彷彿在腦海裡思考身邊的人有沒有我提及的徵狀。
我輕輕地問他：「你有無諗埋自己嘅徵狀㗎？你嘅身體好似已經發出一啲警告訊號啦喎。」
Theo嘆了口氣，苦笑默認，之後我們便開始今天的輔導。
希望更多人能多留意自己和身邊人的情緒狀況，有困難時能及早尋獲適當的協助，避免悲劇發生。
註：為保障學生的身份，文中的個人資料及內容經過改動。
作者：教育心理學家心小姐
Facebook: 教育心理學家心小姐
其他閱讀 :