【小小豬廚房】鎮江醋雞翼
2016-06-16
每晚諗煮咩餸都係一件頭痛事,唔想成日都食埋差唔多嘅食物,唔好話小小豬,就連我都有點悶。難得今日小小豬返學前主動提意食雞翼,咁我就即刻上網搵食譜,終於決定試下呢個酸酸甜甜嘅鎮江醋雞翼!
其實煮雞翼我都煮得幾密,當然係因為小小豬勁鍾意食,基本上佢一個人仔可以最多食四隻,仲多過我呀!
另一個原因就係雞翼真係好易煮,同埋配搭又多元化,最啱我呢啲偽大廚扮勁嘛…哈哈哈!
材料:雞翼一磅、紅蘿蔔一條、蒜頭半粒、蜜糖、鎮江汁~
雞翼解凍後洗乾淨,生抽1.5湯匙、魚露半湯匙及粟粉半湯匙醃大約半小時~
蒜頭拍鬆;蘿蔔去皮以滾筒式切塊~
下油將雞翼兩面煎至金黃~
然後加入蒜頭兜勻,直至炒至聞到好香嘅蒜頭味~
加入紅蘿蔔塊~
落鎮江汁料(大約三分二碗嘅份量就可以)~
之後加少少水(大約加至可蓋過啲雞翼)~
最後加一粒冰糖~
待冰糖溶咗就可以快手炒勻,同時間試一試味,有需要可以因應個人口味加鎮江汁/冰糖。
加蓋慢火煮8分鐘(要間中打開蓋望一望,怕會乾水易燶),大約至收剩1/4汁料,就可以加入蜜糖,快手兜炒~
可以開餐啦~
我都係第一次用鎮江汁嚟煮餸,所以初時都好擔心會唔好食,不過原來個汁酸酸甜甜,幾好食又夠開胃,都幾啱夏天食!
作者:小小豬的成長日誌