生仔要考牌 ｜男同事批評一孩媽唔餵人奶「攰你都要餵㗎」 事主憤怒反駁「你作為男人你明啲咩？」
2023-07-10
生仔要考牌 ｜餵哺母乳可以為孩子帶來多種營養及天然抗體，但是不是每位媽媽都有足夠母乳分泌，而且餵哺母乳或配方奶粉都是每位爸爸媽媽的選擇，外人不宜給予太多評論。有準媽媽在社交平台投稿指，因為個人體質問題而放棄餵哺母乳，但卻遭一名男同事批評，更以自己太太為例子指「我老婆呀，餵到個仔返學呀，學嘢啦！」，於是引來事主怒斥「你作為男人你明啲咩？」
生仔要考牌 ｜男同事批評一孩媽唔餵人奶「攰你都要餵㗎」 事主憤怒反駁「你作為男人你明啲咩？」
-
- 當你以為人奶狂熱分子只限女人嘅時候，其實男人都有
-
- 自上年放完產假，公司都有好多同事關心我，但就有位男同事啲言論真係令我想兜巴車佢
-
- 有啲女同事問我：「你餵人奶定奶粉？」 我：「餵咗個半月就頂唔順要轉返用奶粉啦」
-
- 我一生完後成個人都好虛，又發燒，泵奶又唔夠奶，又做唔到兩個鐘埋身一次，總之成個人攰到熄咗機，甚至係會聽唔到BB喊。
-
- 雖然日頭有陪月幫手，不過即使日頭瞓咗覺，到夜晚都依然係攰到死咁滯，要搞到我老公請成個月事假幫手
-
- 然後有個男同事聽到就話：「攰你都要餵㗎，人奶對BB有益呀。你都可以照半夜起身俾佢啜㗎，咁其實你可以一路俾佢啜一路瞓覺㗎，你坐喺張牀可以唔郁㗎…
-
- 叫你老公換片再抱個仔俾你囉，你使鬼郁咩？」 最令人惱火係佢再話：「我老婆呀，餵到個仔返學呀，學嘢啦！」
-
- 我火遮眼：「你老婆做到唔代表其他人做到，就算佢做到唔代表佢覺得輕鬆，佢只係冇同你呻。鬼唔知餵人奶好呀？我咪講咗我又病又虛又發燒，完全起唔到身囉…
-
- 我順產要剪陰，坐又坐唔到，瞓又瞓唔到，仲叫我全晚坐喺度佢有佢啜我有我瞓？你估湊仔好易呀？」
-
- 「你作為男人你明啲咩？眼見到表面嘅嘢就以為係事實，睇你個款肯定係由得老婆湊，自己就乜都唔理，總之老婆搞得掂就可以咩都唔使理，自己去風流快活，我有冇講中呀？」
-
- 激到個男同事無聲出行開去 奶粉BB都可以好健康，我同老公中咗兩次COVID，個仔依然冇事，而家一歲多啲，至今都冇睇過醫生。
-
- 其實不論飲人奶定奶粉都係會病㗎啦，餵唔到就係餵唔到，你傳教迫人都冇用
近期不少網民在社交平台專頁「生仔要考牌系列」以「母乳」話題投稿，內容不外乎自己餵哺配方奶粉，卻被其他人質疑不餵哺母乳，而最新一篇投稿的事主開首指「當你以為人奶狂熱分子只限女人嘅時候，其實男人都有」。
事源她放完產假回公司工作，與同事閒聊期間講到自己的餵哺情況，講到生產後身體變得虛弱，發燒兼未能上奶，而身體亦疲倦，導致未能「埋身」，「總之成個人攰到熄咗機，甚至係會聽唔到BB喊」，由於晚上沒有陪月幫手，於是要老公整個月請事假協助，坦言「餵咗個半月就頂唔順要轉返用奶粉啦」。
怎料一名男同事聽到對話後，插嘴指「人奶對BB有益呀」，並批評事主「攰你都要餵㗎」，直言她可以一邊餵哺一邊睡覺，「你坐喺張牀可以唔郁㗎，叫你老公換片再抱個仔俾你囉，你使鬼郁咩？」，更自豪地表示「我老婆呀，餵到個仔返學呀，學嘢啦！」
事主對男同事的批評感到不滿，怒斥「你估湊仔好易呀？」，向對方強調其老婆做到，並非代表其他人亦做到，即使可以亦並非對方所言般輕鬆，同時斥責對方「你作為男人你明啲咩？」最後事主坦言餵奶粉的小朋友一樣可以健康，兒子現時1歲亦甚少生病，認為「不論飲人奶定奶粉都係會病㗎啦，餵唔到就係餵唔到，你傳教迫人都冇用」。
帖文引來不少網民留言，認為每位爸爸媽媽餵哺母乳或配方奶粉都是其選擇，外人都不應批評太多。
-
- 網民留言
-
- 網民留言
-
- 網民留言
-
- 網民留言
-
- 網民留言
-
- 網民留言
文章獲「生仔要考牌系列」授權刊登
更多文章：
