許紹雄女兒出嫁 6個字形容嫁女心情 早年購4千呎新加坡大屋贈愛女

許紹雄（Benz雄）的女兒許惠菁（Charmaine）昨晚（16日）與拍拖7年、從事銀行業的男友Shane Sim在香港舉行婚宴，許紹雄的好友杜琪峯、羅蘭、關寶慧、馬德鐘、黃浩然夫婦、宣萱、江美儀、高海寧、歐陽震華、陳豪、陳茵媺、余安安、黃日華、苗僑偉、戚美珍、張兆輝等人到賀。

許紹雄老來得女 被稱為「廿四孝老竇」

許紹雄女兒許惠菁的婚宴在昨晚於香港舉行，被稱為「廿四孝老竇」的許紹雄與一對新人接受TVB娛樂台訪問，談到嫁女心情，許紹雄笑言：「當然感到開心，我一早就瞓咗。」在旁的女兒亦忍不住笑說：「佢chill到爆，我諗瞓得最多嗰個係佢，最遲起身，最早瞓嗰個，不過佢唔會唔捨得，因為而家女結婚，係多咗個仔。」

許紹雄指一指女兒並說：「有人照顧佢喎，幾開心。生BB呢方面由佢哋自己決定，女大女世界。」一對新人笑則笑稱順其自然，暫時享受二人世界，專注事業。再問有否自向女兒傳授夫妻相處之道，許紹雄說：「可以笑的話怎會哭，佢哋知㗎喇，問題係做唔做到，呢啲就要佢哋，唔使教。」再問許紹雄有否以身作則，他笑說：「大家互相尊重喇，我成日都畀人蝦，講笑啫。」新郎哥亦相當識做：「老婆最大！」

到場實客星光熠熠

許紹雄打本愛女做生意

契媽韓馬利和契爺杜燕歌專登從橫店趕回來，對於契女出嫁，杜燕歌笑說：「梗係開心喇，我哋本身冇仔女，但係好鍾意仔女，尤其係女，嗰種感覺好SWEET，希望佢哋互相對大家都好啲，咁就白頭到老！」韓馬利則說：「我同佢哋講，夫妻二人成為一體，冇分你我。」

許紹雄於1992年與新加坡籍太太龍嬿而結婚，五年後獲女兒許惠菁，一直把女兒捧在掌心，許惠菁於2020年浸大傳播系一級榮譽畢業，後來追夢做甜品師獲爸爸Benz雄鼎力支持，Benz雄早前透露新加坡嘅自家豪宅歸妻女名下，更打本700萬畀阿女開Cafe做生意，阿女兩年開三間鋪頭，包括烘焙店、Cafe及茶餐廳，Benz雄年前已斥資2,300萬港元喺新加坡購入4,000呎大屋，歸入女兒名下。

女婿科大碩士畢業

Charmaine去年12月曾在IG貼出與男友的合照，以英文留言說：「碩士一定不會容易，恭喜你，為你感到超級驕傲！」據知，Shane剛從香港科技大學工業工程及決策分析學系（Industrial Engineering and Decision Analytics）碩士畢業。

據知，Shane之前學位課程亦是於科大就讀，2020年工商管理及工業工程商雙學位畢業，更是取得一級榮譽，他過往曾於高盛、Barclays Investment Bank任職，絕對是金融才俊。而Charmaine 18歲時透過朋友認識Shane，認識不久後就開始拍拖，後來一度分手，不過之後兩人重拾舊好，前年10月Shane更向Charmaine求婚成功！

星島頭條授權轉載

更多文章：

38歲可嵐女兒出世 曾做單親媽媽8年終遇真愛 催生順產零止痛1.5小時順利生B

洪永城 三代同堂為媽咪賀壽 2歲Sir Face搶咪為嫲嫲開金口