迪士尼遊玩 | 放低4歲女排隊買嘢食 返位見到女兒眼濕濕 港媽自責:唔敢再放低囡囡
2021-12-14
主題樂園人流較多,要找地方食飯不容易。早前一名港媽獨自帶女兒到迪士尼樂園遊玩,期間因為肚餓便到餐廳用餐,港媽叫女兒坐下等她,自己出去買嘢食,但由於現場人太多,港媽花了不少時間排隊買食物,回到座位時見女兒「眼濕濕」望向她,令港媽自責「唔敢再放低囡囡」。
港媽日前在Facebook群組分享,指星期六獨自帶4歲女兒到迪士尼樂園遊玩,當日園內相當多人,期間因為肚餓便到餐廳用餐,媽媽已特意選人流較少的餐廳,有職員提醒她,記得先搵位,因為餐廳好多人。港媽帶女兒搵到位後,便請女兒坐下等她,「我就同我囡講,你坐喺度等,媽咪去買嘢過嚟食,我仲驚我囡悶,俾咗部電話佢,之後我就放低咗個囡自己一個喺度等,我自己排隊買嘢食。」
港媽指人數真的太多,排隊都花約40-45分鐘,邊排邊「心掛掛」擔心女兒,「拎完嘢食,我已經冇即刻去埋單,而係直接捧去我囡度,我已經迫不及待返去!個心砰砰咁跳,其實我好驚!」,媽媽直言見到女女嗰刻簡直是畢生難忘,自己都嚇到腳軟,女兒沒有玩電話,而是「眼濕濕」望向她,「我唔敢想像當時佢係咩感受,佢當時內心肯定好驚好驚,點解媽咪咁耐都未返嚟。」
其他文章:迪士尼遊玩 | 好心讓座累兒子悶悶不樂 港媽自責:我教他讓人時卻忽略他的感受
媽媽指個種感受心痛到難以形容,「以後寧願唔食,我都唔敢再放低佢,我怕有咩事嘅話,我一世後悔!」。有網友在帖文下留言,提醒媽媽下次不要這樣做,萬一有事都不知點算好,「4歲肯乖乖地坐咁耐,真係好叻!不過媽咪今次真係太危險喇萬一有咩事都唔知點算」、「帶小朋友要帶定嘢食或買外賣,拎出去搵長凳坐,一齊食,始終小朋友安全最重要」、「有小朋友嘅都會好明.. 我唔敢放低佢一個… 真係間間都冇我會寧願走.. 佢哋會好驚架」。
媽媽表示兩日都受良心譴責,所以先出post分享個人經歷,作驚惕用,有網友叫媽媽不要過於自責,下次再安排好些,「媽媽你都唔想,我哋唔係天生出嚟就識做媽媽,無證書拎,都係不斷汲取經驗,加油」、「媽媽唔好自責,你又擔心小朋友餓,又望唔到個女,又排咁耐,個心一定好亂」、「盡量約埋朋友一齊入去玩,多個照應。」。