遭私家車撞飛│14歲利濰留醫4日仍危殆 康復路漫長 母親哭訴：「我好憎個司機！」
2022-11-10
「我好憎呢個司機撞到我個仔！仲要走咗唔理我個仔，我個仔太細，得14、15歲，佢（司機）好冇責任心，如果冇途人救阿仔，點算？」本周一（7日）晚在青山公路遭私家車撞飛10多米身受重創的14歲男童彭利濰，今日（10日）留院第4天，目前仍情況危殆。利濰父母心痛愛兒飛來橫禍，日夜守候愛兒消息，慈母以淚洗面，即使利濰大步檻過渡過危險期，但面對漫長康復之路，父母亦不禁無言問蒼天：「我哋點樣幫佢呢?」
-
- 利濰媽媽想到面對未來不知景況的前路，悲中從來。劉漢權攝
-
- 利濰媽媽擔心兒子康復之路漫長。劉漢權攝
-
- 利濰與媽媽的合照。受訪者提供
-
- 利濰與媽媽的合照。受訪者提供
-
- 利濰與媽媽的合照。受訪者提供
-
- 利濰與媽媽的合照。受訪者提供
歷史科全級第一 校長錄音鼓勵
利濰就讀元朗公立中學，校方知道他遭逢不幸，已立刻啟動危機應變小組，校長、同學都關心他的狀況。其中校長更特別錄下一段錄音，讓利濰父母探望他時放在他耳邊作鼓勵。「利濰，我係校長呀，聽唔聽到？校長好掛住你，你今次要叻仔啲呀！頂住呀！校長希望你快啲好返，返元中，返番學，同你見返面，你記得嗎？校長希望你成為元中畢業生，將來成為一個歷史學家，所以你一定要好返，頂住呀！」利濰媽媽指校內部分同學與利濰要好，學校也擔心他們情緒受困擾，因而啟動了危機處理。
她指利濰最初重創入院，需在腹部內以紗布棉花止血，右手骨折，今日（10日）要開刀做手術取出紗布及固定手部骨折的地方，醫生向她表示，利濰意外後若不及時轉送屯門醫院，「唔一定救得返佢」。「佢最嚴重盤骨同頭部，噚日探完佢，醫生話佢顱壓太高或血壓太高，都好易導致腦幹死亡，所以要顱壓穩定。」
她說兒子雖非校內最尖子，但無論小學、中學均有奪獎，「佢中一、二、三都有攞獎，佢好鍾意歷史科，好多個學期歷史科都係攞第一。佢本來明日(11日)可以上台攞獎，因為佢歷史科考到全級第一，但依家入咗醫院，冇咗呢個機會啦！」利濰媽媽哽咽說道。
談到利濰的現況，彭媽媽十分難過，「佢依家未過危險期，如果過咗危險期，就要諗點樣康復，呢個係最關鍵，最壓力大嘅問題，佢爸爸已經大年紀，如果阿仔吉人天相，渡過呢個難關，條命保咗，但以後康復條路好漫長，點幫到個仔呢？佢爸爸老啦，我哋住村屋，唔知點『嘀』佢出出入入。聽骨科醫生講，阿仔成個散晒，有可能下半身癱瘓，雖然見過有人康復。如果阿仔有幸保住條命，將來面對好多嘢，佢手部神經受損，可能會冇力，將來搵食都係一個問題，唔知點生存？做阿媽點幫佢呢，唔知乜嘢方向！」
利濰是兩老的獨子，早已退休的利濰爸爸與前妻則育有一子，媽媽是家庭主婦，原本打算外出工作幫補生計，但現在利濰突然出事，「我依家全部計劃亂晒！我唔知點安排生活！阿仔康復路要洗幾多錢，點樣幫到佢呢?」她想着面對將來的困境，不禁悲從中來飲泣起來。
這宗意外發生於7日晚上9時許，14歲利濰晚飯後出外，沿青山公路灰沙圍散步，豈料突遭一輛私家車撞飛10數米。利濰身體多處骨折、頭部重創昏迷送院搶救，至今情況危殆，警方其後拘捕車主，但肇事司機仍然在逃。
獲頭條日報授權轉載
更多文章：
