【傑。斯與晴】小JM料理台。腸道問題。通便湯水

小JM媽我從小到大腸胃都屬於敏感型，稍為食到一啲不潔或油膩嘅食物時就會好容易出現肚瀉嘅現像，嚴重嘅有時仲會引發成腸胃炎添。

係孕期嘅時候，小JM喺我肚入面個陣醫生曾經照到小JM腸道有光影，

所以成個孕期都需要照超聲波去監察小JM既腸道健康問題。（政府同私家兩邊走。。。）

而小JM出世個陣仲即刻被送去NICU留院觀察咗一晚，要到第二日嘅中午先可以返來我身邊。

初生時期，小JM都好努力，所以我哋都無遇到特別問題。

直至到小JM開始加固之後，問題就慢慢開始浮現啦。

明顯地見到小JM加固後去便便嘅時候比較辛苦，但事實上小JM嘅膳食一直都係多菜少肉，而且小JM每日都會飲足夠嘅水添。

眼見小JM因為去便便而搞到坐立不安同大喊，當媽嘅既又點會唔擔心。

為咗可以緩解小JM去便便嘅問題，亦試過好多唔同嘅方法，簡單如按摩肚仔及飲用益生菌一樣試過。但好可惜，問題依舊存在。

講真，每當見到小JM因為去便便而攪到喊晒嗰陣，個心真係好痛，亦覺得好自責，因為可以做嘅都做晒，但仍然幫唔到小JM紓緩不適。

為咗可以有效地紓緩便便問題，我決定再次喺小JM嘅飲食方面著手。結果小JM嘅問題終於有所改善，去便便嗰陣唔再喊晒口，媽媽我亦終於都可以鬆一口氣。

保持腸道健康小提示：

－　多進食各類水果、蔬菜、豆類、果仁、全穀類食物，攝取多啲纖維。

－　進食酸奶、乳酪及經過發酵嘅食物有助促進腸道健康

－　最重要當然係要飲多啲水