【柯豬媽媽】 調味料 ・香料篇
2016-08-02
最多媽媽問柯豬媽嘅問題の一，就係「你用咩 調味料 㗎？」其實我用嘅都係非常普通，大間嘅超級市場 (Taste、Aeon supermarket、Market Place、 Wellcome superstore、 threesixty、 Citysuper) 都買到嘅香料，容許我以有限嘅知識同大家分享吓我嘅 調味料 collection！﹔)
Oregano 牛至同Basil蘿勒可以用喺有番茄、茄子、牛肉嘅菜色。
Dill 蒔蘿最啱同魚類海產類一齊煮。
Parsley 香味唔係好突出，我多數灑喺餸菜面做裝飾，或者炒蛋加啲都唔錯。
Thyme 百里香同肉類好夾。
Cinnamon 肉桂多數用喺整蛋糕、鬆餅、麵包，好香！亦試過同百里香一齊用來醃肉，都好味。
Garlic Powder 蒜粉同Onion Powder洋蔥粉可以用來搓肉丸，加添風味。柯豬媽都有就咁加啲蒜粉喺炒菜入面，即刻變得無咁平淡。
Curry Powder 咖哩粉用來煮葡汁咖喱汁，自己調節用量就唔會過辣，大BB(1 year old up) 都食到。
Nutmeg 肉荳蔻可以喺煮白汁芝士汁嘅時候加些少，味道豐富啲。
柯豬媽嚐試自製魚粉作調味，將魚仔乾用焗爐/白鑊烘香脆後blend成粉狀就得，好簡單。炒飯炒菜加些少，感覺上鮮味咗，又唔會鹹。
———————————–
後記
乾嘅香料易於收藏所以用較多，新鮮嘅香草其實都用得，但喺香港買好貴， 一細盒新鮮basil廿幾蚊，加埋都唔知有無廿片葉😞
開封後嘅香料可以放雪櫃，無咁易變潮，待別係粉狀嘅香料。
作者：柯豬媽媽