【傑。斯與晴】小JM料理|簡易懶人版 番茄芝士吞拿魚撻
2017-11-02
媽媽最近行街買咗個小玩意用來整嘢食俾小JM,
部機除咗可以整小蛋糕同冬甩之外,仲可以整埋窩夫添。
希望可以吸引到小JM再食多啲食多啲。
趁幾日假期,媽媽終於手痕開咗部機來玩,
但可惜原來屋企無麵粉喎,
於是乎媽媽就用白方包變化出今次嘅Tea Time輕食茶點!
懶媽媽隨手做茶點系列 -番茄芝士吞拿魚撻
材料:
去皮白方包 一包
番茄 一個
BB芝士 數片
吞拿魚 適量
無鹽牛油 適量
1.) 先將番茄洗淨,再切成小片,備用
2.) 預先將無鹽牛油塗抹於夾板上,再放上白麵包,並壓輕輕按壓成杯狀。
3.) 於面包上放入番茄,再放入吞拿魚蓉,最後再將放多一層番茄及放上BB芝士即可。
4.) 用叉及以手輔助,將麵包既四個角向中心輕壓。
5.) 最後將夾餅機蓋上,等待指示燈由綠變為紅即可取出。
賣相都叫做還可以啦!(媽媽自我安慰中)
每個小撻都脹卜卜,脆卜卜架,
而且仲好足料,無落味精架。
懶媽媽下午茶大功告成!
小JM表示收貨。
你睇小JM食到幾滋味,一路食仲一路笑。
咁就梗係啦,個小撻脆卜卜之餘仲要有小JM最鍾意食嘅番茄添,
難怪係要慢慢享受下嘅。
睇來都係要買定啲麵粉放喺屋企,
以便隨時為小JM預備美點先得啦!
唔知各位媽咪平時又會為小B們預備啲咩類型嘅茶點呢?
有時間嘅媽媽都可以試下整俾小B食呀~^^~
撰文:傑。斯與晴