【荔枝媽媽】夾出專注力
2018-01-29
相信每個屋企都一定有衣服夾吧！
這亦正正係孖媽想推介這個小遊戲俾大家嘅原因，因為每個家庭都可以唔使花金錢，簡單做到。當然作為修讀遊戲治療師嘅孖媽，亦絕對相信遊戲可以為孩子帶來不同程度嘅好處啦！
衣服夾遊戲大約26-30個月以上的小朋友就可以開始練習，當然係更早期嘅時候，孖媽已經有俾佢哋單純地把玩這個衣服夾啦，每個遊戲只要能力所及，唔同階段亦有不同好處。
衣服夾遊戲方法一：
大家可以先預備一個盒，小樽，俾小朋友用栂指、食指、中指把衣服夾夾到小樽邊緣圍繞住。孖媽會配合語言說出，開、合，順便令小朋友明白開同合嘅意思。
呢個活動可以配合手眼協調之外，亦可以提升小朋友嘅專注力，同埋自信心。幫助小朋友認識日常生活嘅用品：衣服夾。當然係可以鍛鍊小朋友小手肌嘅精細度，為小朋友預備一雙寫字的手。
衣服夾遊戲方法二：
孖寶由好細個開始已經會用口數數，但真正認識數量的觀念係一定要識量化物件先可以算得上會。衣服夾遊戲當然亦可以幫助他們強化量化物件嘅概念啦。
我們可以先預備多一些衣服夾，同埋多幾個小樽，當我們講出4時，小朋友就需要把4個衣服夾夾到小樽邊緣上。如是者，重複其他數量。每次小朋友做到，佢地都會好開心架。
衣服夾遊戲方法三：
孖媽我會預備一些不同形紙卡，同埋係衣服夾亦貼上不同形狀的圖案。
遊戲會請小朋友把相對應的形狀嘅紙卡跟衣服夾夾埋一齊，呢個遊戲可以練習小朋友的邏輯概念、空間概念同埋強化小手肌嘅精油度喔！
呢個方法唔單止係用來衣服夾來夾嘢咁簡單，過程中小朋友亦會加深小朋友對顏色同形狀嘅認識。
最重要係可以提升小朋友玩專注力嘅一個小遊戲，小朋友喺搵正正確形狀夾上衣服夾嘅過程中無形中可以訓練到小朋友嘅專注力。
小朋友要搵出正確形狀嘅卡同衣服夾，係可以提升小朋友對於正確專注對象的選擇性。同時亦可以訓練交替性專注力，小朋友需要通過觀察同判斷去完成遊戲。當然亦可以訓練小朋友持續性嘅專注力，因為小朋友要有耐心地去完成呢個遊戲，無形中提升咗小朋友持續性專注力嘅表現。
家長要留意嘅係小朋友可能會因為夾上衣服夾有困難而遇到挫折，但我們只要從旁給予鼓勵同適當嘅幫助，令小朋友可以慢慢自己做到，相信佢哋自己可以係過程中得到滿足感。
最後家長亦可以給予小朋友一些衣服夾， 讓他們自由發揮，比小朋友自己創作有助他們夾出不一樣嘅想像力跟創造力！
呢個小遊戲咁多好處，簡單易做大家都可以喺屋企做到，不妨試下呀！