【小小豬】清熱解毒 - 魚翅瓜螺片雞腳湯

飄忽嘅天氣令到小小豬個濕疹壞朋友又嚟探佢，仲要起喺塊面上，真係….唉，唔想佢食藥就不停同佢內外兼備，不停搽CREAM又煲竹蔗水俾佢飲。

今日行過街市見到有魚翅瓜，咁佢又有清熱解毒嘅功效，所以就買粒返嚟煲魚翅瓜螺片雞腳湯，等三口子有靚湯飲之餘，又等小小豬飲咗可以清下佢體內嘅毒，趕走佢啲壞朋友~

魚翅瓜屬南瓜種，纖維相當豐富，可以清熱解毒、降血糖、降膽固醇；螺片有滋陰補腎及健肝益脾的功效，同時亦有助調理身體及腸胃；紅蘿蔔補肝明目；粟米治療脾胃虛熱、養胃氣、解毒、除煩熱；淮山健脾開胃、肺氣虛燥及消渴尿頻等症；南北杏可止咳下氣，潤燥消積；百合能夠解毒、安神、治療咳嗽失眠，對女性來說還能夠很好的抗衰老；陳皮理氣健脾、燥濕化痰。(網上資料)

魚翅瓜一個、螺片一両、紅蘿蔔一條、粟米一條、百合一両、淮山一両、陳皮一角、南北杏一湯匙、雞腳約十隻及瘦肉$20~

螺片先浸至軟身(大約15-20分鐘)~

其他藥材就浸洗一陣~

陳皮浸至軟身，然後刮囊~

魚翅瓜洗乾淨，然後切件~

紅蘿蔔及粟米去皮切塊~

雞腳及瘦肉洗淨汆水，記得啲腳趾唔好剪，因為剪咗就會係煲湯過程漏咗啲雞油出嚟，咁成煲湯就一定會好油啦~

煲內放約3L水，然後隨水加入陳皮~

滾起後，就可以加入所有材料~

然後繼續用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

溫馨提示： 
– 由於涉及藥材成分，個別人仕體質會有所不同，所以大家記得煲之前了解下自己，如有疑問，請先向註冊中醫查詢！

作者：小小豬Kinsey

其他文章﹕

【小小豬】祛濕解毒 – 牛大力土伏苓粉葛紅蘿蔔豬骨湯 

【小小豬】清熱明目 – 紫無花果杞子菊花茶