【柯豬媽媽】 BB版XO醬 毋須落鹽糖 天然原料 香氣十足
2019-04-30
隨住柯豬和些莉妹長大了，清蒸白烚的食物不一定能滿足到她們的胃口，有咩辦法可以唔駛落咁多鹽糖，而又幫助提升餸菜的味道？ 其中一個柯豬媽常用的方法是使用香草，新鮮或者乾的都可以，各有各好處。
最常用到的是羅勒 basil、迷迭香rosemary、香茅 lemongrass、洋芫荽 parsley、檸檬葉 lemon leaves，佢哋係醃肉的好幫手，或者切碎/磨蓉做醬汁，令餸菜味道更突出。柯豬媽的favorite是將新鮮的羅勒葉+橄欖油打成基本的青醬（傳統的青醬還有蒜頭、松子仁、芝士），加少少去煮 pasta，真係香到無朋友㗎！
如果話小朋友唔鍾意香草的味道，柯豬媽有另一個食譜同大家分享，就係「 BB版XO醬 」！材料非常簡單，只用了櫻花蝦、乾葱頭、蒜頭和油，煮完出嚟齋睇同坊間的XO醬有8成似，但我無加任何的調味料，單靠炒香的蝦、葱和蒜已經非常香口，勁惹味！
柯豬媽建議，可以只用油的部分，用來煎蛋或炒菜，也可以用整個醬料來配飯或麵一起食，都十分搭配。
BB版XO醬 做法：
材料：
櫻花蝦 2湯匙
乾葱 1粒
蒜頭 1粒
植物油 30ml
做法：
1.乾葱切絲，蒜頭切碎。
2.用小鍋燒熱油（不要過熱），先下乾葱爆香，用最細火煮至半透明時加入蒜蓉和櫻花蝦繼續煮。
3.聞到很香很香的味道和櫻花蝦變得香脆，就可以熄火，完成。
小貼士：
- 櫻花蝦，乾葱和蒜頭都係易燒焦的食材，記得要用慢火，慢慢煮，不可以心急用大火煮，很容易變炭，會很苦的
- 植物油可以揀油味淡薄的粟米油/葡萄籽油/米糠油/芥花子油等。
- BB版XO醬攤凍後，放乾淨的容器蓋好可以放雪櫃5~7日，所以不妨煮多一點放雪櫃隨時拎出嚟用。
≡≡≡≡≡≡≡≡≡≡≡≡≡≡≡≡≡≡≡≡≡≡≡≡
作者：柯豬媽媽
其他文章﹕